სახელმწიფო ინსპექტორის სამსახურმა 2019 წელს 156 შემოწმებიდან პერსონალურ მონაცემთა არაკანონიერი დამუშავების 135 შემთხვევაში ფაქტი დაადგინა, - ამის შესახებ ნათქვამია სახელმწიფო ინსპექტორის ანგარიშში, რომელსაც დღეს პარლამენტის იურიდიულ საკითხთა კომიტეტი განიხილავს.
ანგარიშის მიხედვით, შემოწმების საერთო რაოდენობიდან 29% სახელმწიფო ინსპექტორის სამსახურის ინიციატივით, ხოლო 71% - განცხადებებისა და შეტყობინებების საფუძველზე ჩატარდა.
"სახელმწიფო ინსპექტორის სამსახურის ინიციატივით ჩატარებული შემოწმებები (ინსპექტირებები) შეეხებოდა საჯარო დაწესებულებების (41%), კერძო ორგანიზაციებისა (35%) და სამართალდამცავი ორგანოების (24%) მიერ პერსონალურ მონაცემთა დამუშავების კანონიერებას", - ნათქვამი ანგარიშში.
რაც შეეხება დარღვევის სახეებს, ანგარიშის მიხედვით, ყველაზე ხშირად - 27 (20%) შემთხვევაში - დადგინდა მონაცემთა უსაფრთხოების დაცვის მოთხოვნათა შეუსრულებლობა; 25 (18%) შემთხვევაში - მონაცემთა დამუშავება კანონით გათვალისწინებული საფუძვლების გარეშე; 24 (18%) შემთხვევაში - მონაცემთა დამუშავების პრინციპების დარღვევა;
17 (12%) შემთხვევაში - ვიდეოთვალთვალის წესების დარღვევა; 12 (9%) შემთხვევაში - მონაცემთა დამმუშავებლის მიერ მონაცემთა სუბიექტის ინფორმირების წესების დარღვევა; 12 (9%) შემთხვევაში - პირდაპირი მარკეტინგის მიზნებისათვის მონაცემთა წესების დარღვევით გამოყენება; 9 (7%) შემთხვევაში - უფლებამოსილი პირის მიერ მონაცემთა დამუშავება კანონით გათვალისწინებული წესების დარღვევით; 4 (3%) შემთხვევაში - განსაკუთრებული კატეგორიის მონაცემთა დამუშავება კანონით გათვალისწინებული საფუძვლების გარეშე; 3 (2%) შემთხვევაში - სახელმწიფო ინსპექტორის სამსახურის მოთხოვნის შეუსრულებლობა; 1 (1%) შემთხვევაში - საჯარო და კერძო დაწესებულებათა შენობა- ში შესვლისა და შენობიდან გამოსვლის შესახებ მონაცემთა დამუშავების წესების დარღვევა; 1 (1%) შემთხვევაში - მონაცემთა დამმუშავებლის მიერ მონაცემთა დამუშავების უფლებამოსილი პირისათვის დავალება წესების დარღვევით.
გამოვლენილ ადმინისტრაციულ სამართალდარღვევათა 52%-ზე ადმინისტრაციული სახდელის სახით გამოყენებულია ჯარიმა, ხოლო 48%-ზე - გაფრთხილება.
ადმინისტრაციული პასუხისმგებლობა 96 შემთხვევაში დაეკისრა კერძო დაწესებულებას, 22 შემთხვევაში - საჯარო დაწესებულებას, ხოლო 17 შემთხვევაში - სამართალდამცავ ორგანოს.
სახელმწიფო ინსპექტორის სამსახური დამოუკიდებელი სახელმწიფო ორგანოა, რომელიც ანგარიშვალდებულია მხოლოდ საქართველოს პარლამენტის წინაშე. სამსახური ქვეყანაში 2019 წლის 10 მაისიდან ამოქმედდა, როგორც პერსონალურ მონაცემთა დაცვის ინსპექტორის აპარატის (რომელიც 2013 წლიდან არსებობდა) უფლებამონაცვლე.
"სახელმწიფო ინსპექტორის სამსახურის შესახებ“ საქართველოს კანონის თანახმად, სამსახური საქმიანობს სამი მიმართულებით: პერსონალურ მონაცემთა დამუშავების კანონიერების კონტროლი; ფარული საგამოძიებო მოქმედებებისა და ელექტრონული კომუნიკაციის მაიდენტიფიცირებელ მონაცემთა ცენტრალურ ბანკში განხორციელებული აქტივობების კონტროლი; სამართალდამცავი ორგანოს წარმომადგენლის, მოხელის ან მასთან გათანაბრებული პირის მიერ ჩადენილი ცალკეული დანაშაულების მიუკერძოებელი და ეფექტიანი გამოძიება.
