ესპანეთის ხელისუფლების გადაწყვეტილებით, შენგენის ზონის ქვეყნებთან საზღვარი 21 ივნისს გაიხსნება. ამის შესახებ ესპანეთის პრემიერ-მინისტრმა, პედრო სანჩესმა განაცხადა.
სანჩესის განცხადებით, ტურიზმის სექტორის ამუშავება ქვეყნის ეკონომიკის აღდგენის გასაღებია, რომელიც კორონავირუსის პანდემიის შედეგად მნიშვნელოვნად დაზარალდა.
"თავდაპირველად, 21 ივნისიდან საზღვრები შენგენის ზონის ქვეყნებთან გაიხსნება, მოგვიანებით, კი მესამე ქვეყნებთან", - დასძინა პედრო სანჩესმა.
გამონაკლისს წარმოადგენს პორტუგალია, რომელთანაც საზღვრები 1-ლი ივლისიდან გაიხსნება.
მანამდე ევროკომისია წევრ სახელმწიფოებს მოუწოდებდა, შიდა საზღვრები 15 ივნისისთვის გაეხსნათ.
ესპანეთი კორონავირუსის პანდემიისგან მსოფლიოში ერთ-ერთი ყველაზე მეტად დაზარალებული ქვეყანაა. ვირუსის გავრცელების დღიდან ქვეყანაში 243 ათასზე მეტი ინფიცირების შემთხვევა აღირიცხა, გარდაიცვალა 27 ათასზე მეტი ადამიანი.