საქართველოს იუსტიციის მინისტრი თეა წულუკიანი საკონსტიტუციო სასამართლოს მოსამართლედ მის შესაძლო გამწესებას პასუხობს.
როგორც წულუკიანი ტელეკომპანია "იმედის" ეთერში აცხადებს, არ გეგმავს საკონსტიტუციო სასამართლოს მოსამართლეობას და წინასაარჩევნო კამპანიაში აქტიურად მიიღებს მონაწილეობას.
"ოპონენტებმა გამოიგონეს თემა, რომელიც ჩემთვის დილით ერთგვარი სიურპრიზი იყო. ბევრჯერ წავიკითხე, ხომ მართლა მე მეხება - შემდეგ კი ამაზე ხალხს კომენტარები აკეთებინეს. რაც მთავარია, არც იმ ხალხს დაეზარა არარსებულ თემაზე კომენტარების გაკეთება. მინდა ვუთხრა მათ - ნუ გეშინიათ, მე არ მივდივარ საკონსტიტუციო სასამართლოში. შეგიძლიათ იყოთ მშვიდად, ამაზე საუბარიც არ ყოფილა. მე მაქვს გეგმა - ვაპირებ, აქტიურად ვიყო ჩართული წინასაარჩევნო კამპანიაში. თუკი მათ შერჩათ ელემენტარული ლოგიკის უნარი - ერთი მეორეს გამორიცხავს. აქედან გამომდინარე, სჯობს, რომ ისინი მოემზადონ წინასაარჩევნო კამპანიისთვის და ეს ანომალიური ენერგია არ დახარჯონ არარსებულ თემებზე. რაც შეეხება სამოსამართლო პოზიციას, მე ევროპულ სასამართლოში ვარ ნამუშევარი და იმ მიდგომას ვიზიარებ, რომ მოსამართლეობა ადამიანმა შეიძლება გაცილებით მოწიფულ ასაკში ისურვოს“, - განაცხადა წულუკიანმა.