აჭარის ავტონომიური რესპუბლიკის 2019 წლის რესპუბლიკური ბიუჯეტი 106,2 პროცენტით შესრულდა.
ბიუჯეტის შემოსულობების 2019 წლის დაზუსტებული გეგმა 289 846 000 ლარით განისაზღვრა, ფაქტიურმა შესრულებამ 307 830 500 ლარი შეადგინა. წინა წლის ანალოგიურ მაჩვენებელთან (288 841 500 ლარი) შედარებით შემოსულობების ფაქტიური შესრულება 18 989 000 ლარით, 6,6 პროცენტით არის გაზრდილი.
აჭარის მთავარი ფინანსური დოკუმენტის ანგარიში აჭარის უმაღლეს საბჭოში აჭარის ფინანსთა და ეკონომიკის მინისტრმა ჯაბა ფუტკარაძემ წარადგინა. მინისტრმა საბიუჯეტო პარამეტრების შესახებ დეპუტატების შეკითხვებს უპასუხა.
შემოსავლები 108,7 პროცენტით შესრულდა. შემოსავლების გეგმა 270 996 000 ლარით განისაზღვრა, ფაქტიურმა შესრულებამ 294 701 500 ლარი შეადგინა.
სხვა შემოსავლები 198,4 პროცენტით შესრულდა. რესპუბლიკური ბიუჯეტის 2019 წლის სხვა შემოსავლების გეგმა 9 996 000 ლარით განისაზღვრა, ხოლო შესრულებამ 19 830 000 ლარი ანუ გეგმის 198,4 პროცენტი შეადგინა.
გადასახადები 105,3 პროცენტით შესრულდა. საშემოსავლო გადასახადის გეგმა 261 000 000 ლარით განისაზღვრა, ხოლო ფაქტიურმა შესრულებამ 274 871 500 ლარი, ანუ გეგმის 105,3 პროცენტი შეადგინა.