იმედი მაქვს, რომ კორონავირუსის კრიზისის შემდეგ, დემოკრატიის მნიშვნელობის განახლებული აღქმა გაგვიჩნდება , - თქვა საქართველოში აშშ-ის ელჩმა, კელი დეგნანმა, ონლაინპრესკონფერენციაზე "ტაბულას" მიერ დასმულ კითხვაზე საუბრისას.
"ვფიქრობ, ბევრი რამაა, რისი ერთად გაკეთებაც შეგვიძლია ეკონომიკის სტიმულირებისთვის და როდესაც ადამიანები ნახავენ ეკონომიკურ წინსვლას, ვფიქრობ, მათ გაუჩნდებათ ნდობა ხელისუფლებისადმი და დემოკრატიული პროცესისადმი და მოუნდებათ, რომ ჩაერთონ ამ პროცესში.
ვფიქრობ, წელს საქართველოს აქვს ბრწყინვალე შანსი საპარლამენტო არჩევნებით, რომ მოქალაქეები დემოკრატიულ პროცესში ისე ჩაერთონ, როგორც აქამდე, შესაძლოა, არასდროს ჩართულან, რომ მათ ცხადად აჩვენონ კანდიდატებსა და პარტიებს, რა სურთ იხილონ ხელისუფლებისგან, სულ ესაა დემოკრატია.
ამიტომაც, მე დიდი იმედი მაქვს, რომ კორონავირუსის კრიზისის შემდეგ, ჩვენ გაგვიჩნდება განახლებული აღქმა დემოკრატიის მნიშვნელობისა და დემოკრატიულ პროცესში მოქალაქეების ჩართულობის შესახებ", - თქვა ელჩმა.
