საქართველოს პრემიერ-მინისტრის ნიკა გილაურის განცხადებით, იმ შემთხვევაში, თუ "ემ-სი-ეს"-ის მიერ საქართველოსთვის მეორე ტრანშის გამოყოფა მოხდება, იგი ახალი უნივერსიტეტის მშენებლობას მოხმარდება.
ამის შესახებ ნიკა გილაურმა დღეს მთავრობის სხდომაზე განაცხადა. მისი თქმით, '"ემ-სი-ეს"-ის პირველი ტრანში მომავალი წლის მარტში სრულდება და საკმაოდ წარმატებით. ახლა კი საუბარია მეორე ტრანშის გამოყოფაზე.
"ამ გადაწყვეტილებას "ემ-სი-ეს"-ის საბჭო ნოემბერ-დეკემბრის თვეში მიიღებს და თუ ისე მოხდა, რომ მეორე ტრანში გამოგვიყვეს, ის ახალი უნივერსიტეტის მშენებლობას მოხმარდება, რომლის მენეჯმენტი მთლიანად გადაეცემა ერთ-ერთ წამყვან ამერიკულ უნივერსიტეტს", - განაცხადა გილაურმა.
მას არ დაუზუსტებია, რომელ ამერიკულ უნივერსიტეტზეა საუბარი, თუმცა, დასძინა, რომ აღნიშნულ საკითხთან დაკავშირებით მოლაპარაკებები ამ დროისთვის მიმდინარეობს.
