"გამარჯვებული საქართველოს" ლიდერი, ირაკლი ოქრუაშვილი აცხადებს, რომ არჩევნებზე მაჟორიტარ დეპუტატად იყრის კენჭს, ხოლო თუ სად, ამას მოგვიანებით იტყვის. ამის შესახებ მან ოპოზიციის ლიდერების შეხვედრის დასრულების შემდეგ განაცხადა.
"ოპოზიცია მაჟორიტარულ ნაწილში ერთიანი კანდიდატებით უნდა წარდგეს, ერთმნიშვნელოვნად. ამაში დარწმუნებული ვარ. დიდი ალბათობით, დღევანდელი გადასახედიდან, პარტიები დამოუკიდებლად წარდგებიან არჩევნებზე, მაგრამ ამ დამოუკიდებლობას აუცილებლად ექნება საერთო მაჟორიტარების შეთანხმების სტრატეგია. დღეს სამუშაო კონტურები გამოვკვეთეთ. მე აუცილებლად ვიქნები მაჟორიტარი, ოღონდ სად, ამას მოგვიანებით გეტყვით", - განაცხადა ოქრუაშვილმა.
კითხვაზე, იქნება თუ არა ეს გორის მაჟორიტარული ოლქი, მან განაცხადა, რომ "არ არის დარწმუნებული მაგრამ არ გამორიცხავს".
შეგახსენებთ, დღეს, 18 მაისს ოპოზიციურმა პარტიებმა შეხვედრები განაახლეს. დღევანდელი შეკრების შემდეგ ოპოზიციურმა პარტიებმა ერთობლივი განცხადება გაავრცელეს.