ყირიმელი თათრების დეპორტაციის 76 წლისთავთან დაკავშირებით ექვსი ქვეყნის საგარეო საქმეთა სამინისტრო ერთობლივ განცხადებას ავრცელებს.
საქართველო, უკრაინა, ესტონეთი, ლატვია, ლიეტუვა და პოლონეთი ყირიმელი თათრების რეპრესიებს გმობენ.
"76 წლის წინ, 1944 წლის 18 მაისს, საბჭოთა რეჟიმმა ყირიმელი თათრები განდევნა თავისი ისტორიული საცხოვრებელი ადგილიდან, ყირიმიდან უზბეკეთის, ყაზახეთისა და რუსეთის ფედერაციის შორეულ რაიონებში.
გადასახლების პირველ წლებში გარდაიცვალა დეპორტირებული ყირიმელი თათრების თითქმის ნახევარი. სამშობლოში დაბრუნების აკრძალვის პერიოდი კი 1989 წლამდე გაგრძელდა.
ყირიმელ თათართა ხალხის ტრაგედია განმეორდა 2014 წელს, როდესაც რუსეთის ფედერაციამ უკანონოდ სცადა ყირიმის ანექსია, რომელიც უკრაინის განუყოფელი ნაწილია.
შემთხვევითი არაა, რომ რუსეთი, რომელიც სტალინის ტოტალიტარულ რეჟიმს განადიდებს, 21-ე საუკუნეში დროებით ოკუპირებულ ყირიმში თავის დანაშაულებრივ პოლიტიკას აგრძელებს: ყირიმელი თათრების მეჯლისს კრძალავს, ატარებს რეპრესიებს, დევნის იმ ყირიმელ თათრებს, რომლებიც უკრაინის ტერიტორიული მთლიანობის წინააღმდეგ მიმართულ რუსეთის შეიარაღებულ აგრესიას ეწინააღმდეგებოდნენ. ამან აიძულა ათასობით ყირიმელი თათარი, ყირიმის ძირძველი ხალხი, დაეტოვებინათ თავიანთი სახლები და გადასულიყვნენ უკრაინის კონტინენტურ ნაწილში.
ჩვენ პატივს ვცემთ მრავალი უდანაშაულო ადამიანის ხსოვნას, რომლებიც სტალინის რეპრესიებს ემსხვერპლნენ.
ჩვენ მხარდაჭერას ვუცხადებთ ყირიმელ თათრებს თავიანთი უფლებებისთვის ბრძოლაში.
კიდევ ერთხელ ვადასტურებთ უკრაინის სუვერენიტეტისა და ტერიტორიული მთლიანობის მიმართ პატივისცემას, საერთაშორისოდ აღიარებულ საზღვრებში.
ჩვენ ვგმობთ რუსეთის აგრესიულ პოლიტიკას უკრაინის მიმართ და ახალი რეპრესიებს ყირიმელი თათრების წინააღმდეგ.
ჩვენ მოვუწოდებთ რუსეთს, შეაჩეროს საერთაშორისო სამართლის ფუნდამენტური პრინციპების დარღვევა, სრულად შეასრულოს გაეროს გენერალური ასამბლეის რეზოლუციები ადამიანის უფლებათა მდგომარეობის შესახებ ყირიმის ავტონომიურ რესპუბლიკასა და ქალაქ სევასტოპოლში და აღასრულოს საერთაშორისო საზოგადოების მოთხოვნები ყირიმის ავტონომიური რესპუბლიკისა და ქალაქ სევასტოპოლის დეოკუპაციის შესახებ.
რაც უნდა შეეცადოს რუსეთი მიიღოს ნახევარკუნძულის ოკუპაციის ლეგიტიმაცია, ფაქტი უდავოა: ყირიმი უკრაინაა",- ნათქვამია საგარეო საქმეთა მინისტრების ერთობლივ განცხადებაში.
1944 წლის 18 მაისს, საბჭოთა კავშირმა ყირიმის ნახევარკუნძულიდან ათეულობით ათასი ყირიმელი თათრის დეპორტაცია მოახდინა. რეპრესიული პოლიტიკის შედეგად დეპორტირებული იქნა 180 ათასი ყირიმელი თათარი. უკრაინა ამ ფაქტს გენოციდად ცნობს.