ინტელექტუალური საკუთრების უფლებათა აღსრულების საკითხებზე უცხოელ ექსპერტებთან ერთად სამუშაო შეხვედრა მიმდინარეობს.
როგორც "საქპატენტის" ხელმძღვანელი ირაკლი ღვალაძე აცხადებს, ქართველებისთვის მნიშვნელოვანია უცხოური გამოცდილების გაზიარება, მითუმეტეს, რომ უწყება ახალი სამოქმედო გეგმის დაწერაზე მუშაობს.
"ჩვენთან ბელგიელი ექსპერტები არიან ჩამოსულები რათა მოხდეს უცხოური გამოცდილების გაზიარება აღსრულების საკითხებში. მითუმეტეს, რომ ამ მიმართულებით ჩვენ დიდი სამუშოები გვაქვს გაწეული, უკვე დაწერილია სამოქმედო გეგმის პირველი ვარიანტი და ახლა მის დახვეწაზე ვმუშაობთ", - განაცხადა ღვალაძემ.
"საქპატენტის" ინფორმაციით, ახალი სამოქმედო გეგმის დასრულებული ვარიანტი ერთ თვეში იქნება მზად.
შეგახსენებთ, რომ დღეს სასტუმრო "ამბასადორში" საქპატენტისა და ევროკავშირის ორგანიზებით ინტელექტუალური საკუთრების უფლებათა აღსრულების საკითხებზე შეხვედრა გაიხსნა, რომლის მიზანია ქართველ და ევროპელ ექსპერტებს შორის გამოცდილების გაზიარება ინტელექტუალური საკუთრების უფლებათა დაცვისა და აღსრულების საკითხებში.
შეხვედრა ასევე მიზნად ისახავს საქართველოს სხვადასხვა სამთავრობო უწყებასა და კერძო სექტორს შორის ინტელექტუალური საკუთრების დაცვის სფეროში კოორდინაციის ხელშეწყობას. სამუშაო შეხვედრა გამიზნულია სამართალდამცავი ორგანოებისა და ინტელექტუალური სამართლის პრაქტიკოს მუშაკებზე და მათ ევროპასა და საქართველოში ინტელექტუალური საკუთრების უფლებათა აღსრულების სფეროში არსებულ მდგომარეობას გააცნობს.
შეხვედრაში მონაწილეობენ საქართველოს პარლამენტის, სასამართლოს, იუსტიციის სამინისტროს, პროკურატურის, ეკონომიკური განვითარებისა და ფინანსთა სამინისტროს, სხვა სამთავრობო უწყებების, ასევე საერთაშორისო ორგანიზაციების, ბიზნესისა და პროფესიული ასოციაციების წარმომადგენლები.