ხელისუფლება პანდემიის პირობებში საკუთარი ფინანსური თუ პოლიტიკური კაპიტალის დაგროვებას ცდილობს. აცხადებს "ჯი-ეიჩ-ენთან" საუბრისას ჯანდაცვის ექსპერტი, ჯანდაცვისა და სოციალური პოლიტიკის კვლევების ცენტრის დირექტორი, მედიცინის დოქტორი სერგო ჩიხლაძე.
მისი თქმით, შეზღუდვების მოხსნის ფონზე, ხარისხიანი ტესტების მარაგის არქონა ჯანდაცვის სამინისტროს არაკომპეტენტურობასა და გულგრილობაზე მიანიშნებს.
"3 თვე გადის და ჯანდაცვის სამინისტრო კვლავ ვერ ახერხებს ხარისხიანი ტესტების შემოტანას ქვეყანაში. ახლა, როდესაც შეზღუდვები იხსნება და ჩვენ ვირუსის საკონტროლოდ მხოლოდ ტესტირება და ეპიდემიოლოგიური უსაფრთხოების წესები გვრჩება, ხარისხიანი ტესტების მარაგის არქონა არის არაკომპეტენტურობა და გულგრილობა ჯანდაცვის სამინსიტროს ჩინოვნიკების მხრიდან.
ამჯერად 930 000 ლარის ღირებულების შესყიდვა ჩავარდა. 30 000 ჰოლანდიური ტესტის შესყიდვის ნაცვლად, გადაფუთული ჩინური უხარისხო ტესტები შემოაქვს შუამავალ კომპანიას, რომელთანაც ჯანდაცვის სამინისტრომ გააფორმა ხელშეკრულება. როგორც ირკვევა ამ კომპანიის უკანაც დგანან ხელისუფლებასთან დაახლოებული ყოფილი თუ ამჟამინდელი მინისტრები. ეს უკვე მეორე დიდი შესყიდვაა, როდესაც ტიკარაძის უწყება უხარისხო და ყველა ქვეყნის მიერ დაწუნებულ ტესტებს ყიდულობს. მარტის ბოლოს 200 000 უხარისხო ტესტი შეისყიდა სამინისტრომ, რომელიც მერე უკან მიაბრუნა", - აცხადებს სერგო ჩიხლაძე.
როგორც სერგო ჩიხლაძე აცხადებს, ხელისუფლება ცდილობს პანდემიის პირობებში საკუთარი ფინანსური თუ პოლიტიკური კაპიტალის დაგროვებას.
"ხელისუფლება აგვიანებს ხარისხიანი ტესტების მარაგის შექმნას. დაავადებათა კონტროლის ცენტრი მხოლოდ 7 მაისს მიმართავს მთავრობას 5 მილიონი ტესტების გადაუდებელი აუცილებლობით შესყიდვის მოთხოვნით. სხვათა შორის, ამ შესყიდვასაც დიდი ყურადღებით უნდა დავაკვირდეთ, რომ ისევ "ფეიკი" ტესტების შესყიდვა ან ახალ კორუფციულ შეთანხმება რომ შეგვრჩეს ხელში.
ამავე დროს, შეგახსენებთ, რომ, როცა ჩვენი, სტრატეგია აღმაშენებლის გუნდი ჯერ კიდევ 10 მარტიდან ვითხოვთ ქვეყანაში ხარისხიანი ტესტების შემოტანას და სკრინინგისა და დიაგნოსტიკის ფართემასშტაბიან გაშლას. დროში გაწერილი გეგმებიც კი წარვუდგინეთ ხელისუფლებას, მაგრამ ნაცვლად ოპერატიული რეაგირებისა, მივიღეთ პროცესების მიზანმიმართული გაჭიანურება და გაწელილი საგანგებო მდგომარეობა.
მაშინ როდესაც კოვიდინფექცია არის ყველას მტერი, ქართული ოცნებისთვის ის აღმოჩნდა იდეალური პარტნიორი. პანდემიის პირობებშიც, ოცნების ხელისუფლება და მასთან დაახლოებული კლანები ცდილობენ ჯანმრთელობის საკითხებზე სპეკულაციას და საკუთარი ფინანსური თუ პოლიტიკური კაპიტალის დაგროვებას", - აღნიშნავს სერგო ჩიხლაძე.