ბამბუკის სიმცირის გამო კანადის ზოოპარკი ორ პანდას ჩინეთში დააბრუნებს.
როგორც ზოოპარკის ადმინისტრაციის მიერ გავრცელებულ განცხადებაშია ნათქვამი, ჩვეულებრივ, პანდების გამოსაკვებად საჭირო ბამბუკს ჩინეთიდან იღებენ, მაგრამ კოვიდ -19-ის პანდემიის გამო შეწყვეტილმა ფრენებმა მარაგების შეფერხება გამოიწვია.
ჩინეთსა და კანადას შორის გაფორმებული 10-წლიანი შეთანხმების საფუძველზე, ორი პანდა - ერ შან და და მაო, კანადაში 2023 წლამდე უნდა დარჩენილიყვნენ, მაგრამ ზოოპარკმა მათი სამშობლოში დაბრუნება გადაწყვიტა, ვინაიდან კორონავირუსის პანდემიის მეორე ტალღის შემთხვევაში, ცხოველები საკვების გარეშე დარჩებიან.
ზოოპარკი აცხადებს, რომ ისინი ეცადნენ ბამბუკის შესყიდვის ალტერნატიული გზების მოძიებას, მაგრამ მცდელობა ამაო აღმოჩნდა.
ზოოპარკის პრეზიდენტის განცხადებით, ეს წარმოუდგენლად რთული გადაწყვეტილება იყო, თუმცა მისთვის ცხოველების კეთილდღეობა და ჯანმრთელობა უპირველესი პრიორიტეტია.
პანდების კვების რაციონი თითქმის მთლიანად ბამბუკისგან შედგება. ისინი ყოველდღიურად დაახლოებით 40 კგ ბამბუკს მიირთმევენ.