ნაკლებად სავარაუდოა, რომ მსგავსი სერიოზული ოპერაცია საქართველოს ტერიტორიიდან ისე განცხორციელებულიყო, რომ ხელისუფლებას არ სცოდნოდა, - განაცხადა ევროპული საქართველოს წევრმა, გიორგი კანდელაკმა The Daily Mail-ის მიერ გავრცელებულ ინფორმაციასთან დაკავშირებით, რომლის მიხედვით, საქართველოდან კრემლთან დაკავშირებული ჰაკერთა ჯგუფი ბრიტანეთის სამედიცინო დაწესებულებას თავს დაესხა
"ეს ადასტურებს იმას, რაზეც ჩვენ, ევროპული საქართველო, მთელი ეს წლებია ვსაუბრობთ, რომ რუსეთის სპეცსამსახურებისთვის კომფორტული გახდა საქართველოს ტერიტორია. ნაკლებად სავარაუდოა, რომ მსგავსი სერიოზული ოპერაცია საქართველოს ტერიტორიიდან ისე განცხორციელებულიყო, რომ ხელისუფლებას არ სცოდნოდა. თუ არ იცოდნენ ასეთი სერიოზული ოპერაციის შესახებ, მით უარესი. ესე იგი, საქართველოს ტერიტორიაზე საქართველოს ხელისუფლებას კონტროლი აქვს დაკარგული, რაც უბრალოდ, კატასტროფის ტოლფასია", - ამბობს კანდელაკი.
ბრიტანული ტაბლოდური გამოცემა, Daily Mail-ის ინფორმაციით, საქართველოში ბაზირებული, კრემლთან დაკავშირებული ჰაკერთა ჯგუფი თავს დაესხა ლონდონის ერთ-ერთ სამედიცინო დაწესებულებას და ინფორმაცია მოიპარეს.
გამოცემის ინფორმაციით, თავდასხმა განხორციელდა დასავლეთ ლონდონში მდებარე სამედიცინო დაწესებულებაზე, რომელიც კორონავირუსთან ბრძოლაში ჩაბმული ორგანიზაციაა და ინახავს დიდძალ ინფორმაციას კორონავირუსით ინფიცირებული ბრიტანეთის მოქალაქეების შესახებ, ასევე ვაქცინისა და მედიკამენტების კვლევების შესახებ. როგორც გამოცემა იტყობინება, ჰაკერთა დაჯგუფების ნაწილი საქართველოდან მოქმედებდა. თავდასხმა მარტში მოხდა.
მოპარულია ბრიტანეთის მოქალაქეების პასპორტების, სადაზღვევო ბარათებისა და სავიზო დოკუმენტების სკანირებული ფოტოები, ასევე პაციენტების სამედიცინო ისტორიები და ჯანმრთელობის კითხვარები.
თავდასხმაზე პასუხისმგებლობა ჰაკერულმა ჯგუფმა, "მეიზი" აიღო და ინფორმაციის სანაცვლოდ 2 მლნ ფუნტი მოითხოვა.
