"ნავთობპროდუქტების სერტიფიკაციის ორგანო "მონიტორინგისა" და ნავთობპროდუქტების იმპორტიორთა კავშირის მიერ სექტემბრის თვეში კომპანია ,,სოკარ ჯორჯია პეტროლეუმის" მიერ იმპორტირებული აზერბაიჯანის რესპუბლიკის სახელმწიფო ნავთობკომპანიის წარმოებული ბენზინისა (რეგულარი) და დიზელის (ლ-62) საწვავის ხარისხი შემოწმდა. შემოწმება სერტიფიკაციის ორგანო "მონიტორინგსა" და კომპანია ,,სოკარ ჯორჯია პეტროლეუმს" შორის გაფორმებული ხელშეკრულების ფარგლებში განხორციელდა.
ორგანოს აკრედიტირებულმა ექსპერტმა შესაბამისი ნორმების დაცვით ვაგონ-ცისტერნებიდან სინჯები აიღეს და შესამოწმებლად აკრედიტირებულ ლაბორატორიაში გადაგზავნეს, სადაც მისი ხარისხობრივი შემოწმება მოხდა. შემოწმების შედეგად ლაბორატორიამ გასცა გამოცდის ოქმი, რის საფუძველზეც (საწვავის ფიზიკურ-ქიმიური მაჩვენებლების ნორმატიულ დოკუმენტებთან შესაბამისობის შემთხვევაში) სერტიფიკაციის ორგანო "მონტიორინგმა" გასცა სერტიფიკატები.
"სოკარ ჯორჯია პეტროლეუმის" მიერ იმპორტირებული აზერბაიჯანული რეგულარის ტიპის ბენზინის შემოწმების შედეგად დადგინდა შემდეგი ფიზიკურ- ეკოლოგიური მახასიათებლები: ოქტანური რიცხვი რეალურად შეადგენს 93 - 93,5 ერთეულს (საქართველოს მოქმედი კანონმდებლობით უნდა იყოს არანაკლებ 91 ერთეულისა); ტყვიის შემცველობა მასში ფაქტიურად არ არის - 0,0018 - 0,0020 ერთეული (მოქმედი კანონმდებლობით - უნდა იყოს არა უმეტეს 0,013 ერთეულისა); არომატული ნახშირწყალბადების მოცულობითი წილი შეადგენს 31,6 - 32,2 პროცენტს (საქართველოს მოქმედი კანონმდებლობით უნდა იყოს არა უმეტეს 45 პროცენტისა); ბენზოლის მოცულობითი წილი არის 2,8 - 3,3 პროცენტამდე (მოქმედი კანონმდებლობით უნდა იყოს არა უმეტეს 5 პროცენტისა); გოგირდის შემცველობა არის 319 - 323 ერთეული (მოქმედი კანონმდებლობით უნდა იყოს არა უმეტეს 500 ერთეულისა).
რაც შეეხება დიზელის საწვავის ლაბორატორიულ შედეგებს, ცეტანის რიცხვი შეადგენს 49 - 49,5 (მოქმედი კანონმდებლობით - არანაკლებ 45); აფეთქების ტემპერატურა - 66 - 68 0C (მოქმედი კანონმდებლობით - არანაკლებ 62 0C); გოგირდის მასური წილი - 314 - 316 (მოქმედი კანონმდებლობით - არა უმეტეს 350).
შემოწმების შედეგად დადგინდა, რომ ,,სოკარ ჯორჯია პეტროლეუმის" მიერ იმპორტირებული აზერბაიჯანული საწვავი სრულიად შეესაბამება საქართველოს მოქმედ სტანდარტებს.