საქართველოში რეგისტირებული 80 აგრარული ბაზარის უმეტესობამ სტანდარტები ვერ დააკმაყოფილა და ამიტომაც არ გაიხსნა, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა.
მისი თქმით, ბაზრებმა დადგენილი წესები და რეკომენდაციები დაიცვან, რომელიც სურსათის ეროვნულმა სააგენტომ, ჯანდაცვის სამინისტროსთან ერთად შეიმუშავა.
“სურსათის ეროვნულმა სააგენტომ მედიკოსებთან მჭიდრო კომუნიკაციით შეიმუშავეს გაიდლაინები, რომელიც უზრუნველყოფს ბაზრებში სანიტარული სტანდარტების დაცვას და ინფექციის გავრცელების რისკის შემცირებას. პირობები ყველა აგრარულმა ბაზარმა უნდა დააკმაყოფილოს.
ამ მომენტისთვის, საქართველოში რეგისტრირებულია, დაახლოებით, 80 აგრარული ბაზარი, თუმცა უმრავლესი მათგანი ვერ აკმაყოფილებს მოთხოვნებს და შესაბამისად, ჩვენ არ უნდა გვქონდეს წარმოდგენა, რომ დღეიდან იფუნქციონირებს ყველა ის ბაზარი, რომელიც არის რეგისტირებული”, - განაცხადა ლევან დავითაშვილმა.
