დღეს მსოფლიოში ყველა თანხმდება, რომ მხოლოდ შემზღუდავი ღონისძიება არ არის საკმარისად ეფექტური პანდემიასთან საბრძოლველად, აუცილებელია გამოვლენის გაზრდა, - განაცხადა "ჯი-ეიჩ-ენთან" საუბარში ინფექციური პათოლოგიის, შიდსისა და კლინიკური იმუნოლოგიის ცენტრის ექიმმა-ეპიდემიოლოგმა, ნიუ-იორკის შტატის უნივერსიტეტის საზოგადოებრივი ჯანდაცვის სკოლის მაგისტრმა, ეკატერინე ქარქაშაძემ.
მისი თქმით, ჯანმო-ს ერთ-ერთი მთავარი მოწოდებაც სწორედ აქტიური ტესტირება იყო.
„მხოლოდ შემზღუდავი ღონისძიება არ არის საკმარისად ეფექტური პანდემიასთან საბრძოლველად, აუცილებელია გამოვლენის გაზრდა, რომლის ერთი მიზანი ინდივიდუალურად პაციენტების მოვლა-მონიტორინგია და მეორე, არანაკლებ მნიშვნელოვანი - გამოვლენა, ინფექციის შემდგომი გავრცელების პრევენციას გვაძლევს. ჯანმო-ს ერთ-ერთი მთავარი მოწოდებაც სწორედ აქტიური ტესტირება იყო. სხვათა შორის, პასტერის ინსტიტუტის ფრანგმა მეცნიერმა ასეთი შედარება გააკეთა, რომ იზოლაცია და დისტანცირება ღია ჭრილობაზე გაკეთებული პლასტირიაო, რითაც ხაზი გაუსვა, რომ მხოლოდ იზოლაციით შეუძლებელია ამ ვირუსთან ბრძოლა. ეს ყველაფერი გაგრძელდება მანამდე, სანამ გლობალურად მოსახლეობის 60-70% არ იქნება იმუნური ვირუსის მიმართ. უკეთეს შემთხვევაში ეს მიიღწევა ეფექტური ვაქცინით“, - ამბობს ეკატერინე ქარქაშაძე.
