ონის მუნიციპალიტეტის მერის ემზარ საბანაძის ინფორმაციით, ონის მუნიციპალიტეტში ამ დროისთვის 3 ადამიანი იმყოფება თვითიზოლაციის რეჟიმში და ამ ეტაპზე, ვირუსის არც ერთი შემთხვევა არ დაფიქსირებულა.
„შესაბამისი სამსახურების მიერ მუდმივად კონტროლდებიან როგორც თვითიზოლაციაში მყოფი პირები, ასევე მუნიციპალიტეტში რისკის ზონიდან შემოსული მოქალაქეები! მუნიციპალიტეტში სრულიად არის აღჭურვილი და მზადყოფნაშია საკარანტინო ზონა, გადამზადებულები არიან როგორც სამედიცინო პერსონალი, ასევე, მოხალისეთა ჯგუფი.
ონის მუნიციპალიტეტის მერიას, შესაბამის სამსახურებს ჩემი ხელმძღვანელობით მუდმივი კავშირი გვაქვს სამედიცინო პერსონალთან. ვითარება სრულად ექვემდებარება კონტროლს! ქალაქი მარაგდება სასურსათო პროდუქციით. არ დგას დეფიციტის საფრთხე.
მინდა მოგმართოთ თხოვნით, განსაკუთრებით ჩვენს ახალგაზრდებს, რომლებსაც განსაკუთრებით გიხარიათ ერთმანეთის ნახვა და ერთად ყოფნა, გავითვალისწინოთ საგანგებო მდგომარეობის პერიოდში დადგენილი წესები, დავიცვათ სოციალური დისტანცია და დავრჩეთ სახლებში. გავუფრხთილდეთ როგორც საკუთარ, ასევე ერთმანეთის ჯანმრთელობას”, - ამბობს ემზარ საბანაძე.
