მინდა, მოვუწოდო ოპონენტ მხარეს, ამ ჟივილ-ხივილს, გამარჯვების რაღაც უსაფუძვლო ყიჟინას, თავი დაანებონ, - განაცხადა „ქართული ოცნების“ დეპუტატმა, გიორგი ვოლსკიმ, ტელეკომპანია „პირველთან ინტერვიუში“.
მისი თქმით, არის კიდევ გარკვეული დეტალები შესთანხმებელი.
„ კარგია, რომ არ დარჩა არც ერთი შეკითხვა, რაც შეეხება თვითონ სისტემას. მაგრამ, არის კიდევ გარკვეული დეტალები შესთანხმებელი და, აქედან გამომდინარე, მინდა, მოვუწოდო ოპონენტ მხარეს, ამ ჟივილ-ხივილს, გამარჯვების რაღაც უსაფუძვლო ყიჟინას, თავი დაანებონ. საქართველო დაწყნარდა, ისედაც ბევრი პრობლემაა. გადავიდეთ უკვე ჭიდილზე პროგრამების და ჩვენი გეგმების. წინააღმდეგ შემთხვევაში, მეშინია, არ განმეორდეს, რაც 24 ივნისის შემდეგ განმეორდა. კიდევ ეს ხმაური, რომ აბა, ხელები ამოვუტრიალეთ ვიღაცას და, აბა, რაღაც გავაკეთეთ, არასწორია, არარელევანტურია, უსაფუძვლოა. პარტიები რა შუაშუა, საზოგადოება უნდა გამოვიდეს გამარჯვებული. მე ვფიქრობ, ეს ფორმულა საზოგადოებისთვის არის მისაღები და კარგი“, - თქვა ვოლსკიმ.
ოპოზიციამ და ხელისუფლებამ შეთანხმებას მიაღწიეს, რაც ითვალისწინებს მანდატების 120/30-ზე განაწილებას 1%-იანი ბარიერით. ასევე, პოლიტიკური პატიმრების გათავისუფლებას.
