"პატიმრობის კოდექსი კიდევ ერთი ბარიერის შემოტანაა მსჯავრდებულთა ვადაზე ადრე გათავისუფლების საკითხის გადასაწყვეტად და მიზნად ისახავს არა ამ პროცედურის გამარტივებას, არამედ კიდევ უფრო მეტი პრობლემების შემქნას მსჯავრდებულთათვის. ამ პროცედურების შემოღება უფრო გაუმჭვირვალეს გახდის პროცესს და კიდევ უფრო ცოტა მსჯავრდებული ისარგებლებს ამ უფლებით. უნდა აღდგეს პროცედურა, რომელიც არსებობდა ამ ცვლილებებამდე, როდესაც მსჯავრდებული ან მისი დამცველი პირდაპირ მიმართავდა სასამართლოს და ახდენდა საკუთარი უფლებების დაცვას. მოვუწოდებთ უფლებადამცველებს, სახალხო დამცველს, საპარლამენტო ფრაქციებს და ოპოზიციურ პარტიათა წარმომადგენლებს, საკანონმდებლო ინიციატივით გამოვიდნენ, რათა შეიცვალოს პატიმრობის კოდექსით ამოქმედებული პროცედურა პირობით ვადაზე ადრე გათავისუფლების თაობაზე", - ნათქვამია განცხადებაში.

მათი განმარტებით, პატიმრობის კოდექსის ამოქმედებიდან, 1-ელ ოქტომბერს, ძალაში შევიდა პატიმართა ვადაზე ადრე გათავისუფლების ახალი პროცედურები, რომელიც კიდევ უფრო მეტად ბიუროკრატიული, გაუმჭვირვალე და არადემოკრატიულია, ვიდრე ეს იყო დღემდე. კერძოდ, პატიმრობის კოდექსის თანახმად სამინისტროს ადგილობრივი საბჭო (შემდგომში - საბჭო) არის სასჯელის მოხდისგან პირობით ვადამდე გათავისუფლებასთან და სასჯელის მოუხდელი ნაწილის უფრო მსუბუქი სახის სასჯელით შეცვლასთან დაკავშირებული საკითხების განმხილველი ორგანო.