ოკუპირებული ცხინვალის ე.წ. საგარეო საქმეთა სამინისტრო ისტერიას უწოდებს საქართველოს ხელისუფლებისა და დასავლეთის მოწოდებებს, ექიმი ვაჟა გაფრინდაშვილის დაუყოვნებლივ გათავისუფლების შესახებ.
ნათქვამია დე ფაქტო საგარეო საქმეთა სამინისტროს ე.წ. პრესსამსახურის განცხადებაში.
დე ფაქტო საგარეო უწყების თქმით, "ნებისმიერ სახელმწიფოში საზღვრის კვეთაში ბრალდებულები დამსახურებულად ისჯებიან უკანონო ქმედებებისთვის და სამხრეთ ოსეთიც არ არის გამონაკლისი".
"უმეტეს შემთხვევაში, სამხრეთ ოსეთის სახელმწიფო საზღვრის დამრღვევები, ადმინისტრაციული ზომების გამოყენების შემდეგ, დადგენილი წესით გადაეცემა საქართველოს სამართალდამცავი ორგანოების წარმომადგენლებს.
რაც შეეხება გაფრინდაშვილს, მისი ქმედებები შეიცავს დანაშაულის ნიშნებს, რისთვისაც იხდის სასჯელს, ამასთან კი მის პროფესიული საქმიანობას არავითარი კავშირი არ აქვს", - ნათქვამია განცხადებაში.
20 დეკემბერს, საოკუპაციო რეჟიმმა ვაჟა გაფრინდაშვილს 1 წლითა და 9 თვით პატიმრობა მიუსაჯა.
შეგახსენებთ, ცხინვალის საოკუპაციო რეჟიმმა, ე.წ. საზღვრის დარღვევისთვის, 9 ნოემბერს საქართველოს მოქალაქე ვაჟა გაფრინდაშვილი დააკავა.
ცხინვალის საოკუპაციო რეჟიმმა საქართველოს მოქალაქეს, ექიმ ვაჟა გაფრინდაშვილს წინასწარი ორთვიანი პატიმრობა შეუფარდა.
