რომის პაპმა ფრანცისკემ განაცხადა, რომ "პაპის საიდუმლოს" წესი აღარ გავრცელდება საქმეებზე, რომლებიც არასრულწლოვანთა მიმართ სექსუალურ ძალადობას ეხება.
პაპის მიერ გაცემული ახალი ინსტრუქციების შესაბამისად, დანაშაულებების შესახებ ინფორმაცია, თუ ის ეხება არასრულწლოვანთა პორნოგრაფიას ან არასრულწლოვანთა მიმართ სექსუალურ ძალადობას, საიდუმლობით აღარ იქნება დაცული. ასევე, მოწმეები, სავარაუდო დაზარალებულები და საქმეში ჩართული სხვა პირები აღარ იქნებიან შეზღუდულები დუმილის ვალდებულებით.
მანამდე ვატიკანი ეკლესიის წიაღში არსებული სექსუალური ძალადობის შესახებ ფაქტებს საგულდაგულოდ მალავდა, რასაც მსხვერპლთა რეპუტაციისა და სიცოცხლის დაცვის მიზნებით ხსნიდა.
აღსანიშნავია, რომ "პაპის საიდუმლოს" წესის გაუქმება თებერვალში ვატიკანში გამართულ სამიტზე ეკლესიის ლიდერებმა მოითხოვეს.
მათი თქმით, წესის გაუქმება გააუმჯობესებდა გამჭვირვალობასა და პოლიციის თუ სამოქალაქო/იურიდიული ორგანიზაციების შესაძლებლობას, მოეთხოვათ სასურველი ინფორმაცია ეკლესიიდან.
რომის პაპმა შეცვალა ასევე ვატიკანისეული დეფინიცია ბავშვთა პორნოგრაფიის შესახებ და ასაკი 14-დან 18 წლამდე გაზარდა.
"პაპის საიდუმლოს" წესი თავის დროზე ვატიკანისა და მის საელჩოებს შორის კომუნიკაციის დასაცავად შეიქმნა, თუმცა მოგვიანებით, მისი ფუნქცია გაიზარდა და გამოიყენებოდა სექსუალურ და სხვა სენსიტიურ საკითხებზე ინფორმაციის გასასაიდუმლოებლად.
