ევროკავშირის საგარეო საქმეთა სამსახური ეხმიანება უზენაესი სასამართლოს მოსამართლეების დამტკიცებას და აღნიშნულთან დაკავშირებით განცხადებას ავრცელებს, რომელსაც უცვლელად გთავაზობთ:
"გუშინ, საქართველოს პარლამენტმა დაამტკიცა უზენაესი სასამართლოს 14 მოსამართლე. უზენაესი სასამართლო საქართველოს მართლმსაჯულების გამართული მუშაობისთვის საკვანძო ინსტიტუტია.
შერჩევის პროცედურა არ ითვალისწინებდა ვენეციის კომისიის რეკომენდაციებს და იგი ნაკლოვანებებით ხასიათდებოდა, მათ შორის იყო გამჭირველობის ნაკლებობა. ამ ფაქტმა ნეგატიური გავლენა მოახდინა მოსამართლეთა წარდგენის პროცესზე, რა დროსაც მათი დამსახურებები უნდა ყოფილიყო გათვალისწინებული.
ზოგიერთი კანდიდატურა არ სარგებლობს საზოგადოების მაღალი ნდობით, რაც ნათლად გამოჩნდა შერჩევის პროცესში.
მიუხედავად იმისა, რომ პარლამენტში ჩატარებული მოსმენები იყო გამჭვირვალე, საბოლოო კენჭისყრამდე, მეტი ძალისხმევა უნდა გამოყენებულიყო კანდიდატთა დამტკიცების დასაბუთებისთვის.
საქართველოს ვალდებულებას, დაიცვას ეთიკისა და მიუკერძოებლობის უმაღლესი სტანდარტები სასამართლო სისტემაში, მთავარი მნიშვნელობა აქვს სასამართლო სისტემისადმი საქართველოს მოქალაქეების ნდობისა და ევროკავშირი-საქართველოს დღის წესრიგის განვითარებისთვის.
საჭიროა შერჩევის პროცედურების გადასინჯვა, რათა მომავალში გათვალისწინებული იქნეს ვენეციის კომისიის, ეუთო/ოდირისა და სხვა ძირითადი დამკვირვებლების მიერ გამოთქმული რეკომენდაციები არსებულ ხარვეზებთან დაკავშირებით", - ნათქვამია განცხადებაში.