ნიკა მელიასთვის დეპუტატის უფლებამოსილების შეჩერებაზე პარლამენტმა არ უნდა იჩქაროს, - განაცხადა დეპუტატმა ეკა ბესელიამ თბილისის საქალაქო სასამართლოს გადაწყვერტილებაზე, რომლის თანახმად, ნიკა მელიას 3 წლითა და 2 თვით ჩამოართვა საჯარო სამსახურში დასაქმების უფლება.
ბესელიას თქმით, თუ ზედა ინსტანციის სასამართლო საქალაქოს განაჩენს გააუქმებს, შემდეგ სტატუსი, შესაძლოა, ვეღარ აღდგეს.
"თუ აღმოჩნდება ისე, რომ პარლამენტი მიიღებს გადაწყვეტილებას და შეუწყვეტს დეპუტატს უფლებამოსილებას და შემდეგ ზემდგომმა ინსტანციამ ჩათვალა, რომ არასწორი გადაწყვეტილება მიიღო ქვედა ინსტანციის სასამართლომ და გააუქმა, ასეთ შემთხვევაში, პარლამენტის წევრის სტატუსის აღდგენა, შეიძლება ვეღარ მოხდეს. ამიტომ, სამართლისა და სამართლიანობის ლოგიკას უნდა გაჰყვეს პარლამენტი და არ უნდა იჩქაროს, ისე როგორც ეს გააკეთა და იჩქარა, როდესაც წინასწარი პატიმრობის საკითხზე და თანხმობა მისცა დაპატიმრებაზე და მერე სასამართლომ თქვა, რომ ეს ასე არ უნდა იყოს“, - ამბობს ბესელია.
ნიკა მელიასათვის დეპუტატის სტატუსის შეჩერებაზე დასკვნა საპროცედურო და წესების კომიტეტმა უნდა მიიღოს.
თბილისის საქალაქო სასამართლომ "ქართუს გაკოტრების" საქმეზე ნიკა მელია ერთ ეპიზოდში გაამართლა, მეორეზე კი, 25 000-ლარიანი ჯარიმა მიუსაჯა. ამასთან, სასამართლომ ნიკა მელიას 3 წლით და 2 თვით ჩამოართვა საჯარო სამსახურში დასაქმების უფლება.
დაცვის მხარე პირველი ინსტანციის სასამართლოს გადაწყვეტილებას გაასაჩივრებს.
