საქართველოს პარლამენტმა მთავრობას პარიზში საქართველოს საელჩოს ლევილის მამულში გადატანის რეკომენდაციის მიმართა. ამის შესახებ აღნიშნულია "საქართველოს 2020 წლის სახელმწიფო ბიუჯეტის შესახებ" საქართველოს კანონის პროექტზე საქართველოს პარლამენტის მიერ გამოთქმულ რეკომენდაციებში.
"ჩვენი ქვეყნის საელჩოს საფრანგეთში არ გააჩნია საკუთარი შენობა, შესაბამისამა უწყებებმა განიხილონ შესაძლებლობა: მემორიალური ცენტრის პარლალელურად, საქართველოს დიპლომატიური წარმომადგენლობა განთავსდეს ლევილის მამულში.
ამ შემთხვევაში ლევილის მამულს ექნება, არა მხოლოდ დიდი კულტურულ-ისტორიული, არამედ პოლიტიკური დატვირთვაც ქართული სახელმწიფოსათვის ევროპაში", - ნათქვამია პარლამენტის რეკომენდაციაში.
რეკომენდაციის საპასუხოდ, საქართველოს მთავრობა აცხადებს, რომ საელჩოს დედაქალაქის გარეთ განთავსების საკითხი განსაკუთრებულ ლოგისტიკურ მოთხოვნებთან არის დაკავშირებული.
"საქართველოს დიპლომატიური წარმომადგენლობის დედაქალაქის გარეთ განთავსების საკითხი, გარდა ფისკალური რესურსისა, მნიშვნელოვნად არის დაკავშირებული დიპლომატიური სამსახურის სპეციფიკასთან და განსაკუთრებულ ლოგისტიკურ მოთხოვნებთან, შესაბამისად პირდაპირ კავშირში არ არის საბიუჯეტო ციკლთან.
მიზანშეწონილია აღნიშნული საკითხების განხილვა გაგრძელდეს საგარეო საქმეთა სამინისტროსთან, ბიუჯეტის პროექტის განხილვის პროცედურების მიღმა", - ნათქვამია მთავრობის საპასუხო განცხადებაში.
ცნობისთვის, ლევილის მამული საქართველოს 2016 წლის სექტემბერში გადმოეცა.