ინდოეთის მინისტრთა კაბინეტმა ქვეყნის მასშტაბით ელექტროსიგარეტის მოხმარების, წარმოების, იმპორტის, რეალიზაციისა და რეკლამირების აკრძალვის შესახებ განცხადება გამოაქვეყნა და დასძინა, რომ ის ჯანმრთელობას სერიოზულ საფრთხეს უქმნის.
აკრძალვის გარდა, ელექტროსიგარეტის მოხმარებისა და რეალიზაციისთვის დაწესებულია სანქციები. მომხმარებლებისთვის დაწესებული იქნება ფულადი ჯარიმა, ხოლო მწარმოებლებს შესაძლოა 3 წლით თავისუფლების აღკვეთა დაემუქროთ.
ინდოეთში დაახლოებით 100 მლნ-ზე მეტი სრულწლოვანი მწეველი ცხოვრობს, რაც ელექტრონული სიგარეტის მწარმოებელი კომპანიებისთვის უზარმაზარ პოტენციურ ბაზრად აქცვევს.
ინდოეთი თამბაქოს ნაწარმის მოხმარების რაოდენობის სიდიდით, მსოფლიოში მეორე ქვეყანაა ჩინეთის შემდეგ და ყოველწლიურად 900 000-ზე მეტი ადამიანი იღუპება ქვეყანაში თამბაქოსთან დაკავშირებული დაავადებების შედეგად.
შეგახსენებთ, გასულ კვირას, ნიუ იორკი გახდა აშშ-ის მეორე შტატი, სადაც ელექტროსიგარეტის მოხმარება აიკრძალა. მანამდე შესაბამისი აკრძალვა მიჩიგანის შტატში დააწესეს.
ცოტა ხნის გავრცელდა ინფორმაცია, რომ ტრამპის ადმინისტრაცია გეგმავს არომატიზებული ელექტროსიგარეტების ამკრძალავი ფედერალური კანონის შემუშავებას.
გასულ თვეში, ილინოისის შტატში საავადმყოფოში გარდაიცვალა მამაკაცი, რომლის გარდაცვალების მიზეზი შესაძლოა ელექტროსიგარეტი ყოფილიყო.
აშშ-ის დაავადებათა კონტროლის ცენტრის ინფორმაციით, გაზრდილია ელექტრონული სიგარეტის გამოყენების შემდეგ რესპირატორული დაავადებების სიმპტომების მქონე ადამიანების ჰოსპიტალიზება.
მათივე განცხადებით, ისინი აკვირდებიან 193 შემთხვევას, რომელიც 28 ივნისიდან აგვისტოს ჩათვლით მოხდა. 193-ვე პაციენტი ელექტრონული სიგარეტის მომხმარებელია.
ოფიციალური ორგანოები თავს იკავებენ იმის მტკიცებისგან, რომ დაავადებების გამომწვევი მიზეზი ელექტრონული სიგარეტია, თუმცა ვარაუდობენ, რომ დიდი ალბათობით, ეს შეიძლება იყოს სპეციალური სითხე, რომელიც გამოიყენება ელექტორნულ სიგარეტში.
როგორც დაავადებათა კონტროლი აცხადებდა, ყველა პაციენტს მსგავსი სიმპტომები აღენიშნებოდა, სუნთქვის გაძნელება, ქოშინი, ტკივილი გულ-მკერდის არეში. ზოგიერთ შემთხვევაში კი დიარეა და ღებინება.