პარლამენტის თავმჯდომარის მოადგილე, საპარლამენტო უმრავლესობის ლიდერის გიორგი ვოლსკის განცხადებით, დღეს მედია, როგორც ეს მთელ მსოფლიოში ხდება, ზოგადად სკანდალზეა ორიენტირებული, რასაც ხელისუფლება იმ ძლიერი მექანიზმით უნდა დაუპირისპირდეს, რაც არის კონკრეტული საქმე.
"ვფიქრობ, რეალურად ერთადერთი ძლიერი მექანიზმი არის კონკრეტული საქმე, რომელიც უნდა გააკეთო და თითოეულ ადამიანამდე უნდა მიიტანო, თუ რამე სიკეთის გაკეთება შეგიძლია. გასწორებული მიწასთან სოფლის მეურნეობა, საერთოდ სოფელი უკვე ამოძრავდა, გაცოცხლდა, იქ მეურნეობები შეიქმნა, ექსპორტზე გადის პროდუქცია გაცილებით უფრო მეტი ვიდრე 2012-ში. რაღაცეები აღარ მინდა ჩამოვთვალო, ბანალური გამომივა, მაგრამ რეალურად მე ვფიქრობ მაინც საქმე, ყოველდღიური საქმიანობა, მუშაობა თითოეული საჯარო მუშაკის, თუნდაც არჩეული ადგილობრივი ხელისუფლება იქნება ეს, თუ რესპუბლიკური მასშტაბის, უნდა იყოს ორიენტირებული კონკრეტულად ადამიანზე", - განაცხადა გიორგი ვოლსკიმ ტელეკომპანია „იმედის" ეთერში თოქშოუში „პირისპირ".
ვიცე-სპიკერის განცხადებით, მნიშვნელოვანი პროცესები მიმდინარეობს ქვეყანაში, ქვეყნის გარეთ და მათი გაშუქება, სამწუხაროდ, ნაკლებად ხდება, ვინაიდან დღეს მედიისთვის უფრო საინტერესოა სკანდალზე ორიენტირებული თემები.
„მე არ ვამბობ რომ მხოლოდ სიცრუის ტირაჟირება ხდება. საერთოდ მედიას, ნეიტრალურ მედიაზე მაქვს ლაპარაკი, თავს ახვევენ დღის წესრიგს, რომელიც სკანდალზეა ორიენტირებული და გასაგებია, რომ უფრო მოთხოვნადია.
სამწუხაროდ, ეს ასეა არა მხოლოდ საქართველოში, არამედ მთელ მსოფლიოში", - აღნიშნა გიორგი ვოლსკიმ და განაცხადა, რომ ხელისუფლება ამ პროცესს ყოველდღიური საქმიანობით უნდა დაუპირისპირდეს, რომელიც ორიენტირებული იქნება კონკრეტულად ადამიანზე.