საპარლამენტო ფრაქცია „ერთიანი ნაციონალური მოძრაობის“ წარმომადგენლებმა მთავრობის წევრებთან შეხვედრა 20 ივნისის ღამით მომხდარი დარბევის კადრებით გახსნეს.
როგორც ფრაქციის თავმჯდომარე რომან გოცირიძემ აღნიშნა, ესაა საზოგადოების , ქართველი ხალხის მთავარი კითხვა მთავრობისადმი - თუ ვინ მოაწყო გავრილოვის ღამე, ვინ გასცა ბრძანება.
„რატომ მოხვდა ბავშვებს ტყვია, ვინ ჩაიდინა დანაშაული, ვინ აგო ამ დანაშაულისთვის ხელისუფლებიდან პასუხი. ნაცვლად იმისა, რომ ეს ადამიანები იყვნენ განსასჯელის სკამზე, ისინი მთავრობაში გვევლინებიან. და საერთოდ, 20 ივნისის მოვლენების შემდეგ, რატომ მიდის საქართველო პოლიციური სახელმწიფოს გზით?!
20 ივნისის შემდეგ დაიწყო რეპრესიები, პოლიტიკური ლიდერების დაპატიმრება. მელია შიდა პატიმრობაშია, არ აძლევთ კონსტიტუციურ უფლებას იმუშაოს პარლამენტში, ოქრუაშვილი დააკავეთ. გვარამიას მიმართ აღძარით სისხლის სამართლის საქმე. რუსთავი 2 დახურეთ და შეასრულეთ რუსეთის სათათბიროს დეპუტატების სანუკვარი ოცნება.
აგრძელებთ მედიასაშუალებების წინააღმდეგ ბრძოლას ,იგივე ტელეკომპანია პირველის მიმართ.
ბიზნესი დაატერორეთ, თიბისი ბანკის ხელმძღვანელობა ფაქტობრივად ქვეყნის შიდა პატიმრობაშია. გააჩერეთ ანაკლიის პროექტი. კულმინაცია დღეს ადამიანები რომლებმაც პასუხი უნდა აგონ, მთავრობაში გვევლინებიან“- განაცხადა გოცირიძემ.
