პარლამენტის წევრმა, შალვა კიკნაველიძემ, კომიტეტების გაერთიანებულ სხდომაზე, სადაც მინისტრობის კანდიდატებს უსმენენ, ყურადღება საქართველო-ნატოს ურთიერთობებსა და გამყოფი ხაზის მიმდებარედ მოსახლეობის უსაფრთხოების საკითხებზე გაამახვილა.
დეპუტატმა კითხვით თავდაცვის მინისტრობის კანდიდატს, ირაკლი ღარიბაშვილს მიმართა და იმ გეგმებითა და პროექტებით დაინტერესდა, რომელთა განხორციელებასაც საქართველო ნატოსთან მეტად დაახლოების მიზნით უახლოეს მომავალში გეგმავს. უმრავლესობის დეპუტატმა საქართველოში ცოტა ხნის წინ ჩატარებული ნატოს სწავლებებიც გაიხსენა და იმედი გამოთქვა, რომ თავდაცვის სამინისტრო, კვლავ აქტიურად იქნება ჩართული ნატოსთან ინტეგრაციის პროცესში.
სიტყვით გამოსვლისას, შალვა კიკნაველიძემ, შინაგან საქმეთა მინისტრობის კანდიდატს, ვახტანგ გომელაურს იმ ღონისძიებების შესახებ სთხოვა ინფორმაციის მიწოდება, რომლებსაც ქართული მხარე გამყოფი ხაზის ირგვლივ მცხოვრები მოსახლეობის უსაფრთხოების დაცვის მიზნით ახორციელებს. უმრავლესობის წევრმა ქართული საგუშაგოების ირგვლივ ბოლო პერიოდში შექმნილ მდგომარეობაზეც ისაუბრა და საკითხის დარეგულირების პროცესში ჩართულ მხარეებს მადლობა გადაუხადა.
შალვა კიკნაველიძემ იმედი გამოთქვა, რომ სამთავრობო გუნდი და ახალი სამთავრობო პროგრამა პარლამენტისგან შესაბამის მხარდაჭერას მიიღებს. „დარწმუნებული ვარ პარლამენტში წარმოდგენილი სამთავრობო გუნდი და პროგრამა აუცილებლად მიიღებს შესაბამის მხარაჭერას. უმრავლესობის მიერ წარმოდგენილ გუნდს აქვს ქვეყნის განვითარების სწორი ხედვა, პროცესების სწორად მართვის გამოცდილება, რაც დღეს ჩვენ წინაშე არსებული გამოწვევების ეფექტურად გამკლავებაში დაგვეხმარება“ - განაცხადა კიკნაველიძემ.
