არანაირი შეკითხვა ამ ადამიანებთან ჩვენ არ გვაქვს და ამ ფორმატში არანაირ განხილვაში მონაწილეობას არ მივიღებთ, აცხადებს „ევროპული საქართველოს“ წევრი ირაკლი აბესაძე.
მისი თქმით, „ევროპული საქართველო“ საკომიტეტო ფორმატში მინისტრობის კანდიდატების მოსმენაში არც დღეს მიიღებს მონაწილეობას.
„გახარიას წარდგენა პრემიერ-მინისტრობის კანდიდატად არის საზოგადოებაზე ძალადობა და ხელის გადაგრეხვის მცდელობა. ამ სიტუაციაში ნორმალური პოლიტიკური დიალოგი ვერ იქნება, მით უმეტეს, არანაირი შეკითხვები არ შეიძლება არსებობდეს ცალკეულ მინისტრებთან, სადაც ფორმალურადაც კი არ განხორციელებულა არც ერთი ცვლილება. ეს ადამიანები პასუხისმგებლები არიან სასამართლო სისტემის უმძიმეს კრიზისში შეყვანაში, სამართალდამცავი სისტემის პოლიტიკურ იარაღად ქცევასა და ყველა იმ სერიოზულ, მავნებლურ ნაბიჯში, რომელსაც „ქართული ოცნება“ დგამდა სამართალდამცავი სისტემის მიმართულებით. ამიტომ, არანაირი შეკითხვა ამ ადამიანებთან ჩვენ არ გვაქვს და ამ ფორმატში არანაირ განხილვაში მონაწილეობას არ მივიღებთ“, – განაცხადა ირაკლი აბესაძემ.
