შევეცდებით, დავამშვიდოთ საინვესტიციო სამყარო, რომ არც ერთ ინსტიტუტს, სადაც მე და მამუკა ხაზარაძე ვართ, საფრთხე არ ემუქრება, განაცხადა „თიბისი ბანკის“ ერთ-ერთმა დამფუძნებელმა ბადრი ჯაფარიძემ.
ბადრი ჯაფარიძის თქმით, ყველაფერს გააკეთებენ, რომ არც ერთი პროექტი, სადაც ის და მამუკა ხაზარაძე მონაწილეობენ, არ შეფერხდეს და პრობლემა არ შეექმნას.
„შემიძლია გითხრათ, რომ ეს დევნა გრძელდება უკვე წელიწადია. სამწუხაროდ, ეს არის მამუკასა და ჩემ მიმართ პირადი დევნის გაგრძელება. ეს აყენებს უზარმაზარ ზიანს ქვეყანას, იმ პროექტებს, რომლებშიც ჩვენ ვართ. ყველაფერს გავაკეთებთ, რათა არც ერთი პროექტი, სადაც მე და მამუკა ვმონაწილეობთ, არ შეფერხდეს და არანაირი პრობლემა არ შეექმნათ. ჩვენ განვიხილავთ ყველა საჭირო ზომას, მათ შორის იმისთვის, რომ ბანკის აქციონერები იყვნენ მშვიდად, რომ ბანკს არანაირი საფრთხე არ ემუქრება. სამწუხაროდ, ყოველი ასეთი ბრიფინგი, რომელიც ტარდება, იწვევს აფორიაქებას მთელს საინვესტიციო სამყაროში. ჩვენ შევეცდებით, დავამშვიდოთ საინვესტიციო სამყარო, რომ არც ერთ ინსტიტუტს, სადაც ჩვენ ვართ, არანაირი საფრთხე არ ემუქრება. განვიხილავთ ყველა იმ ნაბიჯს, რომელიც უზრუნველყოფს ამ ინსტიტუტებისა და პროექტების შეუფერხებელ ფუნქციონირებასა და განვითარებას“, – განაცხადა ბადრი ჯაფარიძემ.
