დღეს, 24 სექტემბერს, 12:00 საათზე, სასტუმრო "ქორთიარდ მარიოტში" ფინანსთა მინისტრი კახა ბაინდურაშვილი და "ბიზნეს ასოციაციის" პრეზიდენტი გიორგი ჭირაქაძე მსოფლიო ეკონომიკური თავისუფლების მოხსენების მიხედვით საქართველოს პოზიციების გაუმჯობესებაზე გააკეთებენ განცხადებას.
ფრეზერის ინსტიტუტის (Fraser Institute) 2010 წლის მსოფლიო ეკონომიკური თავისუფლების მოხსენების (Economic Freedom of the World: 2010 Annual Report)
მიხედვით, საქართველო, წინა წელთან შედარებით, 22 პოზიციით დაწინაურდა და 141 ქვეყანას შორის 23 ადგილზეა (7,47 ქულით). გასულ წელს გამოცემულ აღნიშნულ რეიტინგში, საქართველო 45-ე ადგილს (7,24 ქულით) იკავებდა.
ფრეზერის ინსტიტუტის 2010 წლის გამოცემა ქვეყნების ეკონომიკური თავისუფლების ინდექსს 2008 წლის მონაცემებით ითვლის.
მიმდინარე წელს გამოცემული მსოფლიო ეკონომიკური თავისუფლების რეიტინგში საქართველომ გაუსწრო ისეთ ქვეყნებს, როგორიცაა: გერმანია (24-ე ადგილი), ლიტვა (33), ბულგარეთი (36), ესპანეთი (39), ბელგია (43), სომხეთი (50), ლატვია (55), საბერძნეთი (60), იტალია (66), რუსეთი (84), აზერბაიჯანი (93) და სხვა.
რეიტინგში პირველ ადგილზე ჰონკონგი, ხოლო ბოლოზე ზიმბამბვე იმყოფება.
2010 წლის მსოფლიო ეკონომიკური თავისუფლების მოხსენებაში, საქართველოს პოზიციის დაწინაურება განპირობებულია შემდეგი ფაქტორებით: ქვეყანაში სახელმწიფო დანახარჯების წილის შემცირება; მდგრად ვალუტაზე ხელმისაწვდომობის ზრდა (ფულის მოცულობის ზრდა ეკონომიკაში და დაბალი ინფლაციის სტანდარტული გადახრა); საერთაშორისო ვაჭრობის ზრდა, სავაჭრო ბარიერების, ბიზნესის რეგულირების ბიუროკრატიული დანახარჯებისა და პროცედურების შემცირება, ბიზნესის დაწყების გამარტივება და სხვა.
მსოფლიო ეკონომიკური თავისუფლების მოხსენებას ფრეზერის ინსტიტუტი ყოველწლიურად აქვეყნებს. მოხსენებაში გამოკვლეულია მსოფლიოს 141 ქვეყნის ეკონომიკური თავისუფლების ინდექსის განმსაზღვრელი მონაცემები.
ინდექსი ზომავს ქვეყნის ეკონომიკურ თავისუფლებას ხუთი ძირითადი სფეროს მიხედვით: მთავრობის ზომა: ხარჯები, გადასახადები და საწარმოები; სამართლებრივი სტრუქტურა და საკუთრების უფლების დაცვა; მდგრადი ვალუტის ხელმისაწვდომობა; საერთაშორისო ვაჭრობის თავისუფლება; კრედიტების, შრომისა და ბიზნესის რეგულირება