საქართველოს ჯანდაცვის მინისტრის, ანდრია ურუშაძის განცხადებით, მთავრობის დადგენილებით ჯანმრთელობისა და სოციალური დაცვის სააგენტოში რეორგანიზაცია მოხდება. ეს განცხადება მინისტრმა გაზეთ "პრაიმთაიმის" პრეს-კლუბში, ჟურნალისტებთან შეხვედრისას გააკეთა.
მისი თქმით, ამ სააგენტოს კონტროლ ქვეშ მყოფი თანხები სხვადასხვა სააგენტოებზე გადანაწილდება.
"მთავრობის სხდომაზე გავიარეთ როგორც სამინისტროს, ასევე სოციალური და ჯანმრთელობის დაცვის სააგენტოს რეორგანიზაციის საკითხი. სამინისტროში რეორგანიზაცია არ იგეგმება, სააგენტოში კი მთავრობის დადგენილებით რეორგანიზაცია განხორციელდება. სააგენტოს უფლებები გადაუნაწილება სხვადასხვა სააგენტოებს. ეს არ მოახდენს არცერთი კონტრაქტორის უფლებების შეზღუდვას", _ განაცხადა ურუშაძემ.
ურუშაძის განმარტებით, ეს ცვლილებები უფლებების დალაგებას გამოიწვევს და ყველა სოციალურ სააგენტოს ეცოდინება თავის საქმე.