ნაცმოძრაობა ჩამოყალიბდა ძალიან საშიშ ორგანიზაციად. ეს არის რადიკალური, ტერორიზმისკენ გადახრილი ორგანიზაცია, ძალიან საშიში გამოვლინებებით, - განაცხადა „ქართული ოცნების“ პოლიტიკურმა მდივანმა, ირაკლი ღარიბაშვილმა ტელეკომპანია "პირველის" გადაცემა "რეაქციაში", 20 ივნისის მოვლენებზე საუბრისას.
მისი თქმით, კადრებშიც ჩანს, 200-300 ადამიანი, რომელთაც ეტყობოდათ რომ სპეციალური წვრთნა ჰქონდათ გავლილი. "ეს სამასი ადამიანი უწევდა მთელ ამ ქაოსს ორგანიზებას და შტურმი იყო მათ მიერ ორგანიზებული", - განაცხადა ღარიბაშვილმა.
"აქედან გამომდინარე, სახელმწიფო ვერ და არ დაუშვებდა პრეცენდენტს. ასეთი პრეცენდნეტი, მცდელობაც კი უნდა იყოს თავშივე ჩახშობილი. ყველა ის პირი, რომელიც ამ ძალიან საშიშ პროვოკაციაში მონაწილეობდა, სახელმწიფოს წინააღმდეგ უნდა იყოს უმკაცრესად დასჯილი. მე ამის მომხრე ვარ. უფრო მეტს გეტყვით, მე მომხრე ვიყავი და ვარ, იმავე ღამეს მომხდარიყო ყველას დაკავება. მთ შორის, იმ აგრესიული 200 თუ სამასი ადამიანის", - განაცხადა ღარიბაშვილმა.
