2019 წლის 20 ივნისისს მოვლენებს უფლებადაცვითი ორგანიზაცია, "ჰიუმან რაიტს უოჩი" ეხმიანება და ამბობს, რომ თბილისში სპეცდანიშნულების რაზმა რეზინის ტყვიები და ცრემლსადენი გაზი გაფრთხილების გარეშე გამოიყენა.
"2019 წლის 20 ივნისს პოლიციის სპეცრაზმმა თბილისში, საქართველოს პარლამენტის წინ, გაფრთხილების გარეშე გამოიყენა რეზინის ტყვიები და ცრემლსადენი გაზი საპროტესტო აქციის ათასობით არაძალადობრივი მონაწილის წინააღმდეგ. ვინაიდან საპროტესტო აქციის მონაწილეებსა და სამართალდამცავებს შორის გრძელდება დაპირისპირება, ხელისუფლებამ დაუყოვნებლივ უნდა მიუთითოს პოლიციას - დაიცვას ძალის გამოყენების საერთაშორისო კანონმდებლობით განსაზღვრული წესები, რომელთა თანახმად, პოლიციამ საპროტესტო აქციის მონაწილეებისგან მომდინარე საფრთხის საპასუხოდ უნდა გამოიყენოს მკაცრად პროპორციული ძალა. ისეთი ზომა კი, როგორიც რეზინის ტყვიებია, უნდა გამოიყენოს მხოლოდ უკიდურესი აუცილებლობის შემთხვევაში",- ნათქვამია განცხადებაში.
უფლებადაცვითი ორგანიზაცია 20-21 ივნისის ღამის ვითარებას ასე აღწერს:
"დაძაბულობამ იმატა ღამის 10 საათისთვის. საპროტესტო აქციის ზოგიერთმა მონაწილემ გაარღვია პოლიციის პირველი კორდონი, რომელიც პარლამენტის შენობას აქციის მონაწილეებისგან იცავდა. სპეცდანიშნულების რაზმმა ისინი უკუაგდო. საპროტესტო აქციის ზოგიერთი მონაწილე და პოლიცია ერთმანეთს აწვებოდნენ, სხვები კი ცდილობდნენ გაერღვიათ პოლიციის კორდონი. პოლიციამ გამოიჩინა თავშეკავება მათი მოგერიებისას.
ხალხის მასა დიდწილად არაძალადობრივი იყო, თუმცა ზოგიერთი მომიტინგე პოლიციას წყლის ბოთლებს ესროდა. „ჰიუმან რაიტს უოჩი“ პირდაპირი ეთერების საშუალებით აკვირდებოდა მიმდინარე მოვლენებს და დაინახა, რომ იყო რამდენიმე შემთხვევა, როცა პოლიციის სპეცდანიშნულების რაზმის წევრები საპროტესტო აქციის მონაწილეთა მასაში აღმოჩნდნენ, რის შემდეგაც აქციის მონაწილეები მათ უსაფრთხოდ აცილებდნენ“,- წერია განცხადებაში.
რაც შეეხება მოვლენათა შემდგომ განვითარებას, ორგანიზაცა წერს:
"შუაღამისას, ყოველგვარი გაფრთხილების გარეშე, პოლიციის სპეცდანიშნულების რაზმმა ხალხის მასის მიმართულებით ცრემლსადენი გაზისა და რეზინის ტყვიების სროლა დაიწყო. ვიდეოჩანაწერებსა და ფოტოებზე ჩანან ადამიანები, რომლებიც რეზინის ტყვიებით დაზიანდნენ თავის, ფეხებისა და ზურგის არეში.
დილის 1 საათზე შსს-მ გაავრცელა განცხადება, რომლის თანახმადაც, ხალხის მასა „გასცდა გამოხატვის თავისუფლების და მშვიდობიანი შეკრების კანონით დადგენილ ფარგლებს და მიიღო ძალადობრივი ხასიათი. მიუხედავად სამინისტროს მხრიდან მოწოდებისა, აქციის მონაწილეები განაგრძობდნენ პარლამენტში შეჭრის მცდელობას“ და წინააღმდეგობას უწევდნენ პოლიციას",- ნათქვამია უფლებადაცვითი ორგანიზაციის განცხადებაში.
აღსანიშნავია, რომ უფლებადამცველმა ორგანიზაცია „ჰიუმან რაიტს უოჩმა” პოლიციას შეახსენა, რომ პოლიციამ პატივი უნდა სცეს ძალის თანაზომიერად გაზრდის პრინციპს და როცა სამართალდამცავები იყენებენ ძალას, მათ უნდა გამოიჩინონ თავშეკავება.
"ძალის გამოყენებისას, სამართალდამცავი ორგანოების წარმომადგენლები ვალდებული არიან დაიცვან შეკრების თავისუფლება და ადამიანის უფლებათა სტანდარტები იმისდა მიუხედავად, კანონიერ დემონსტრაციას შლიან თუ უკანონოს. სამართალდამცავთა მიერ ძალის გამოყენებისა და ცეცხლსასროლი იარაღის გამოყენების შესახებ გაეროს ფუძემდებლური პრინციპები პოლიციისგან მოითხოვს არაძალადობრივი საშუალებების გამოყენებას, როგორიცაა ძალისა და იარაღის გამოყენებამდე ტერიტორიის დაცლისკენ მოწოდება.
პოლიციამ პატივი უნდა სცეს ძალის თანაზომიერად გაზრდის პრინციპს. როცა სამართალდამცავები იყენებენ ძალას, მათ უნდა გამოიჩინონ თავშეკავება, იმოქმედონ საფრთხის პროპორციულად და ეცადონ ზიანის მინიმიზაციას",- აღნიშნულია განცხადებაში.
