პრემიერ-მინისტრი მამუკა ბახტაძე ჯანდაცვის მინისტრის ცვლილებას არ უარყოფს. მამუკა ბახტაძემ მთავრობის სხდომის დაწყებამდე გამართულ ბრიფინგზე განაცხადა, რომ სერგეენკო იყო, არის და მუდმივად იქნება მათი გუნდის ერთგული და წარმატებული წევრი.
მისი თქმით, გუნდში განახლება და ახალი სისხლის მიღება არის საქართველოს მთავრობის პრიორიტეტი.
„მოვლენებს წინ არ გავუსწროთ. გუნდში განახლება და ახალი სისხლის მიღება ჩვენ განვაცხადეთ, რომ არის ჩვენი პრიორიტეტი. დავით სერგეენკო იყო, არის და მინდა დაგარწმუნოთ, მუდმივად იქნება ჩვენი გუნდის ერთგული და წარმატებული წევრი“, – აღნიშნა მამუკა ბახტაძემ.
საქართველოს ოკუპირებულიტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი დავით სერგეენკო თანამდებობას ტოვებს. ამის შესახებ „ჯი-ეიჩ-ენი“, წყაროზე დაყრდნობით, რამდენიმე დღის წინ წერდა. წყაროს ინფორმაციით, სერგეენკომ სამუშაო კაბინეტიდან საკუთარი ნივთები უკვე გაიტანა. "ჯი-ეჩ-ენისთვის" ცნობილი გახდა, რომ ჯანდაცვის მინისტრის პოსტზე სააჩხერის კლინიკის დირექტორი ეკატერინე ტიკარაძის კანდიდატურა განიხილება.
ეკატერინე ტიკარაძე საჩხერის საავადმყოფოში 2009 წლიდან მუშაობს, 2015 წელს კი მან კლინიკის დირექტორის პოსტი დაიკავა.
