დუშეთის მუნიციპალიტეტში ინფრასტრუქტურული სამუშაოები მიმდინარეობს. შენდება გოდერძი ჩოხელის სახლ-მუზეუმი სოფელ ჩოხში. რეაბილიტაცია უტარდება ოძისის, ჩირიკის, აბანოსხევის, ზანდუკის, პირმისაანთკარისა და ჭილურტის საჯარო სკოლებს. მიმდინარეობს ისტორიული უბნების რეაბილიტაცია ქალაქ დუშეთში. პროექტი ითვალისწინებს 40 ისტორიული სახლის რესტავრაციას (რომელთაგან 24 კულტურული მემკვიდრეობის სტატუსის მატარებელია) და მიმდებარე ტერიტორიის კეთილმოწყობას. ასევე, მიმდინარეობს ანანურის ციხე-კომპლექსის მიმდებარე ტერიტორიის კეთილმოწყობა. პროექტის ფარგლებში მოეწყობა ტურისტული ინფრასტრუქტურა და პარკირების სივრცე, განთავსდება თანამედროვე ტიპის სავაჭრო ჯიხურები, გაკეთდება გადასახედი. შენდება საზოგადოებრივი ცენტრი ქალაქ დუშეთში.
მუნიციპალიტეტის მასშტაბით აქტიურად მიმდინარეობს საგზაო ინფრასტრუქტურის მოწყობის სამუშაოები. რეაბილიტაცია უტარდება შიდა საუბნო გზებს და სანაპიროსთან მისასვლელ გზას სოფელ ანანურში, ჩანადირთკარი-საკრამულის დამაკავშირებელ გზას ბაზალეთის ადმინისტრაციულ ერთეულში. ასევე, მიმდინარეობს გოგებაშვილის ქუჩის, აღმაშენებლის ქუჩის მონაკვეთისა და ბაჩანას ქუჩიდან აღმაშენებლის ქუჩამდე მონაკვეთის მოასფალტება ქალაქ დუშეთში.
რეაბილიტაცია უტარდება წყალმომარაგების სისტემას დუშეთის მუნიციპალიტეტის რამდენიმე სოფელში - ბარისახოში, ზოტიკიანთკარში, შალიკიანთკარში, ზემო არანისში და უნდილაანთკარში.
სოფლის მხარდაჭერის პროგრამის ფარგლებში შერჩეული პროექტების განხორციელება მიმდინარეობს სოფლებში - ლამოვანი, წითელსოფელი, ნაგლიანთკარი, ბიჩნიგაურები, დუდაურები და ქერანა.
