საქართველოში არსებული მსხვილფეხა პირუტყვის რძისა და ხორცის ინდუსტრიებში სურსათის უვნებლობისა და ხარისხის სტანდარტების გაუმჯობესების მიზნით, აშშ-ის სოფლის მეურნეობის სამინისტრო - საქართველოს ფერმერთა ასოციაციასთან, Land O’Lakes International Development-თან და მიჩიგანის სახელმწიფო უნივერსიტეტთან პარტნიორობით ახალი პროექტი დაიწყო.
5-წლიანი პროექტის „ინვესტირება უვნებელ და ხარისხიან მესაქონლეობაში - საქართველო“ წარდგენა 28 მაისს, სასტუმრო „რუმსში“ გამართა. ღონისძიებას საქართველოში აშშ-ის ელჩის მოვალეობის შემსრულებელმა ელიზაბეტ რუდმა და გარემოს დაცვისა და სოფლის მეურნეობის მინისტრმა ლევან დავითაშვილმა უმასპინძლეს.
პროექტის საჯარო წარდგენაზე დამსწრე საზოგადოებას სიტყვით მიმართეს თურქეთში აშშ-ის საელჩოს, აშშ-ის სოფლის მეურნეობის სამინისტროს კანცლერმა ქრისტინ სტროსმანმა, პროექტის „ინვესტირება უვნებელ და ხარისხიან მესაქონლეობაში“ ხელმძღვანელმა იეტონ სტაროვამ და საქართველოს ფერმერთა ასოციაციის თავმჯდომარემ ნინო ზამბახიძემ.
პროექტი დაფინანსებულია აშშ-ის სოფლის მეურნეობის სამინისტროს მიერ, „სურსათი პროგრესისთვის“ (Food for Progress SQIL) პროგრამის ფარგლებში და მოსალოდნელი ბიუჯეტია 14.5 მილიონი აშშ დოლარი.
„დიდი მოლოდინია, რომ პროექტის ფარგლებში, მოხდეს მსხვილფეხა პირუტყვის რძისა და ხორცის ინდუსტრიებში ჩართული მეწარმეების უნარების გაძლიერება, რათა მათ საწარმოებში სანიტარული და ფიტოსანიტარული სტანდარტების გაუმჯობესება მოახდინონ. ამასთან, ინიციატივა ასევე ითვალისწინებს საქართველოს მთავრობის ტექნიკურ მხარდაჭერას, საერთაშორისო სტანდარტების შესაბამისი პოლიტიკური და ინსტიტუციური რეფორმის განხორციელებაში. გააქტიურდება თანამშრომლობა ინდუსტრიულ ასოციაციებთან, რეფორმებთან შესაბამისი სტანდარტების შემუშავების პროცესში. ასევე, ასოციაციების ჩართულობის გაზრდა მთავრობასთან ფერმერთა ინტერესების ადვოკატირების საქმეში,“ განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა.
„საქართველოში რძისა და ხორცის სექტორები ხასიათდება დაბალი პროდუქტიულობით, ფერმერებს აქვთ არარეგულარული წვდომა ბაზრებზე, ცხოველთა კვების არასწორი პრაქტიკა, აღინიშნება კვალიფიციური ვეტერინარების ნაკლებობა და სხვა მრავალი გამოწვევა. ამ ინდუსტრიების მხარდაჭერისთვის, აუცილებელია თანამედროვე ტექნოლოგიებზე დაფუძნებული ინტენსიური მეურნეობების განვითარების ხელშეწყობა, რაც შესაძლებლობას მისცემს ადგილობრივი პროდუქცია გახდეს უფრო ხარისხიანი, საერთაშორისო სტანდარტებთან შესაბამისი და კონკურენტუნარიანი,“ - განაცხადა საქართველოს ფერმერთა ასოციაციის თავმჯდომარემ ნინო ზამბახიძემ.
პროექტის „ინვესტირება უვნებელ და ხარისხიან მესაქონლეობაში“ მიზანია სოფლის მეურნეობის პროდუქტიულობისა და ვაჭრობის პოტენციალის გაზრდა პროგრამაში ჩართლი 54,000-ზე მეტი ბენეფიციარისთვის მთელი საქართველოს მასშტაბით. პროექტი ითვალისწინებს Land O’Lakes International Development-ის ტექნიკურ დახმარებას, ორგანიზაციის ინოვაციური და ბაზრის მოთხოვნის შესაბამისი მიდგომების გამოყენებასა და დანერგვას, იმისათვის, რომ გაიზარდოს სურსათის უვნებლობისა და ხარისხის სტანდარტები მსხვილფეხა პირუტყვის რძისა და ხორცის ღირებულებათა ჯაჭვებში „ფერმიდან სუფრამდე“ პრინციპით. ზიანის შემცირებისა და პროდუქტიულობის გაზრდის გზაზე, პროექტი მიზნად ისახავს ფერმერების ხელშეწყობას მსხვილფეხა პირუტყვის რძისა და ხორცის პროდუქტების დამატებით ბაზრებზე შევიდნენ.
Land O'Lakes International Development-ის შესახებ: Land O’Lakes International Development-ი მხარს უჭერს მსოფლიოში ეკონომიკის განვითარებას ადგილობრივი სოფლის მეურნეობის დარგების გაძლიერების გზით, ეხმარება ბიზნესებს შექმნან სამუშაო ადგილები და აკავშირებს ფერმერებს ბაზრებთან. 1981 წლიდან, Land O’Lakes International Development-ს განხორციელებული აქვს 300-ზე მეტი რძის, მეცხოველეობისა და მოსავლის განვითარების პროგრამები 80-მდე ქვეყანაში, რითაც ხელს უწყობს ფერმერთა ზრდას, კოოპერაციასა და ბიზნესის განვითარებას.
Land O’Lakes International Development-ი არის Land O’Lakes-ის შვილობილი კომპანია. Land O’Lakes, Inc.,-ი არის $15 მილიარდ დოლარიანი აგრობიზნესი, რომელიც საზოგადოებას სთავაზობს თითქმის 100 წლიან გამოცდილებას რძის, ცხოველთა საკვების, მოსავლისთვის საჭირო სასოფლო-სამეურნეო საშუალებებისა და თანამედროვე აგრო-ტექნოლოგიების სფეროში. იგი განვითარებაზე ორიენტირებულ პროექტებს აძლევს უნიკალურ ხედვას სოფლის მეურნეობაზე, სურსათზე და გამართულ საბაზრო სისტემაზე. Land O’Lakes, Inc.-ი მხარს უჭერს აღნიშნულ ძალისხმევას, როგორც მის მიზანს, ხელი შეუწყოს საზოგადოების პროგრესს ქვეყნის შიგნითა და მსოფლიო მასშტაბით.
საქართველოს ფერმერთა ასოციაციის შესახებ: საქართველოს ფერმერთა ასოციაცია წარმოადგენს არასამეწარმეო არამომგებიან იურიდიულ პირს, რომელიც 2012 წლის ბოლოს დაფუძნდა. ორგანიზაცია ამჟამად 4000-მდე ფერმერს აერთიანებს მთელი საქართველოს მასშტაბით. მისი წევრი ფერმერებისგან მინიჭებული მანდატის შესაბამისად, ასოციაცია ასრულებს ფერმერებსა და ხელისუფლებას შორის შუამავალი რგოლის ფუნქციას.
მიჩიგანის სახელმწიფო უნივერსიტეტის შესახებ: მიჩიგანის სახელმწიფო უნივერსიტეტი არის საზოგადოებრივი კვლევითი უნივერსიტეტი მიჩიგანის შტატის ქალაქ აღმოსავლეთ ლანსინგში. უნივერსიტეტი დაარსდა, როგორც მიჩიგანის შტატის სასოფლო-სამეურნეო კოლეჯი და ქვეყნის პირველი უმაღლესი სასწავლებელი, სადაც ისწავლებოდა სოფლის მეურნება, როგორც მეცნიერება.
