საქართველოს კონკურენციის სააგენტოს თავმჯდომარემ ნოდარ ხადურმა და ამერიკის შეერთებული შტატების ვაჭრობის დეპარტამენტის გენერალურმა მრჩეველმა პიტერ დავიდსონმა ფარმაცევტულ ბაზარზე კონკურენციის დანერგვისა და შენარჩუნების ხელშეწყობის საკითხებზე სემინარი გახსნეს. ღონისძიებაზე ასევე სიტყვით გამოვიდა საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე, აკაკი ზოიძე. სემინარი ამერიკის შეერთებული შტატების ვაჭრობის დეპარტამენტის კომერციული სამართლის განვითარების პროგრამის (CLDP), აშშ-ის ფედერალური ვაჭრობის კომისიის, საქართველოში აშშ-ის საელჩოს და საქართველოს კონკურენციის სააგენტოს თანაორგანიზებით იმართება. სამ დღიანი სემინარი საქართველოში აშშ-ის სახელმწიფო დეპარტამენტის დაფინანსებით ტარდება.
დამსწრე საზოგადოებას ასევე სიტყვით მიმართა აშშ ის საელჩოს ეკონომიკური სამსახურის უფროსმა მაქენზი როუმ; შეერთებული შტატების ფედერალური ვაჭრობის კომისიის ადვოკატმა მეგან იორიანმა და CLDP-ის სამართლებრივმა მრჩეველმა სქიფ მარკმა. მოწვეული ექსპერტები საერთაშორისო პრაქტიკასა და გამოცდილებაზე დაყრდნობით, ფარმაციის სფეროში არსებულ გამოწვევებსა და ტენდენციებზე, კონკურენციის დაცვის საკითხებზე, უწყების როლსა და დანიშნულებაზე, შესაბამისი ბაზრის ანალიზის, ფასისა და ხარისხის რეგულირების საკითხებზე მსჯელობენ. სამ დღიანი სემინარის ფარგლებში, მონაწილეები განიხილავენ და საერთაშორისო ექსპერტებისგან ინფორმაციას მიიღებენ, როგორ ხდება აშშ-სა და ევროკავშირში მედიკამენტების დამტკიცებისა და შესყიდვის ფორმების შემუშავება, ფარმაცევტული ბაზრის მომარაგების სისტემის მართვა, რისკების შეფასება, შესაბამისი ბაზრის გამჭვირვალობისა და მომხმარებელთა უფლებების დაცვის პრინციპების ხელშეწყობა.
სემინარი დისკუსიის, რეკომენდაციების მიღების ფორმატში მიმდინარეობს, რომელშიც მონაწილეობას ქვეყანაში მოქმედი ფარმაცევტული კომპანიების, დარგობრივი ასოციაციებისა და საქართველოს კონკურენციის სააგენტოს წარმომადგენლები იღებენ.
შეგახსენებთ, რომ საქართველოს სახალხო დამცველის მიერ გაცემული რეკომენდაციით, საქართველოს პარლამენტის მიერ მიღებული დადგენილების საფუძველზე, საქართველოს კონკურენციის სააგენტო ფარმაცევტული ბაზრის მონიტორინგს ახორციელებს.
