თბილისში ძლიერმა წვიმამ და სეტყვამ პრობლემები შექმნა. დაზიანებულია სახლის სახურავები, დატბორილია ეზოები, სარდაფები და სადარბაზოები. საგანგებო სიტუაციების მართვის სამსახურის ინფორმაციით, უხვი ნალექის შედეგად წარმოქმნილ დატბორვის ფაქტებზე მათთან 90-მდე შეტყობინება შევიდა.
„შეტყობინებების უმეტესობა, ძირითადად, დიღმის მასივის, დიდუბე-ჩუღურეთისა და გლდანი-ნაძალადევის რაიონებიდან დაფიქსირდა. 
ძლიერი წვიმის შედეგად, დაიტბორა საცხოვრებელი სახლებისა და კორპუსების ეზოები, სადარბაზოები, სარდაფები და პირველი სართულები. მომხდარის შედეგად არავინ დაშავებულა. საგანგებო სიტუაციების მართვის სამსახურის მეხანძრე-მაშველები საგანგებო რეჟიმში განაგრძობენ მუშაობას. ამ დროისთვის, თბილისის ყველა უბანში ვითარება სტაბილურია”, - აღნიშნულია საგანგებო სიტუაციების მართვის სამსახურის მიერ გავრცელებულ ინფორმაციაში
მეტეოროლოგების ცნობით, უხვი ნალექი დიდ წილად გლდანსა და სანზონაში მოვიდა. სინოპტიკოსების ინფორმაციით, დედაქალაქში წვიმა ამ დროისთვის შეჩერებულია, თუმცა საღამოს ისინი ნალექს ისევ ელოდებიან.
