არაქართველი მოსწავლეებისათვის ორენოვანი სახელმძღვანელოები გამოიცა, სადაც სასწავლო მასალის 35% ქართულ ენაზეა. სომხურ, აზერბაიჯანულ და რუსულ ენებზე ითარგმნა VII, VIII, X, XI და XII კლასების ისტორიისა და გეოგრაფიის წიგნები, რომლებიც უფასოდ გადაეცემათ მოსწავლეებს. ბილინგვური სწავლება არაქართულენოვან მოსწავლეებს სახელმწიფო ენის შესწავლაში დაეხმარება.
აღნიშნული სახელმძღვანელობი საქართველოს განათლებისა და მეცნიერების მინისტრმა დიმიტრი შაშკინმა დღეს მარნეულის №3 საჯარო სკოლის მოსწავლეებს გადასცა.
2010-2011 აკადემიური წლისათვის, სამინისტრო სულ 35, 874 არაქართულენოვან მოსწავლეს უზრუნველყოფს ისტორიისა და გეოგრაფიის ორენოვანი წიგნებით (75,895 სახელმძღვანელო). ასევე, არაქართულენოვანი სკოლებისა და სექტორების ყველა მე-4 კლასის მოსწავლე უსასყიდლოდ მიიღებს "ქართული, როგორც მეორე ენის" სახელმძღვანელოს.
"ქართული ენის პროგრამის" ფარგლებში აღნიშნული ინიციატივისათვის სახელმწიფომ 2010 წლისათვის 600,000 ლარზე მეტი გამოყო. მოსწავლეები წიგნებს თავიანთ სკოლებში სწავლის დაწყებამდე მიიღებენ. მომავალში სახელმძღვანელოები სკოლის ბიბლიოთეკებს დარჩება და შემდგომში მის გამოყენებას სხვა არაქართულენოვანი მოსწავლეები შესძლებენ.
