"სოციალურ ქსელებში თურმე ერთი ამბავი არის ატეხილი, როგორ გავბედე და სიტყვა „სამშობლო“ როგორ ჩავსვი კანონში. როდის მერე გახდა ხალხო, სამშობლო საგინებელი და სალანძღავი სიტყვა? როდის მერე გახდა სამშობლო რაღაც ცუდთან ასოცირებული?", - პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძე სოციალურ ქსელ "ფეისბუკით" მის დღევანდელ განცხადებას, ბავშვის უფლებათა კოდექსში სიტყვა "სამშობლო"-ს შემოტანასთან დაკავშირებით, ეხმიანება.
შეგახსენებთ, რომ დღეს, სოფო კილაძემ ჟურნალისტებთან საუბრისას „ბავშვის უფლებათა კოდექსის“ საკომიტეტო განხილვის დაწყებამდე განაცხადა, „ძალიან ვამაყობ იმით, რომ ჩვენ საკანონმდებლო ისტორიაში პირველად, კანონმდებლობის დონეზე შემოგვაქვს სიტყვა „სამშობლო“ და ის, რომ ჩვენი შვილები ჩვენი სამშობლოს, ჩვენი ენის, ჩვენი კულტურული ტრადიციების სიყვარულით უნდა აღვზარდოთ“.