საპენსიო სააგენტოდან ყველა კითხვაზე ამომწურავ პასუხებს ვიღებთ, აცხადებს ბუღალტერთა კავშირის თავმჯდომარე ტატა ბერიძე. მისი განმარტებით, საპენსიო სააგენტოს ყველა თანამშრომელ აწყობილად მუშაობს.
"საერთოდ ბუღალტრებს სიახლეები და ცვლილებები ნაკლებად გვიყვარს. მოგეხსენებათ ყველა სიახლეს სჭირდება დანერგვა, რაც თავისთავად ამძიმებს, ისედაც დაძაბულ სამუშაო რეჟიმს და გვიორმაგებს საქმის მოცულობას.
საპენსიო რეფორმა სწორედ ასეთ სიახლედ მოგვევლინა. ბუღალტრებს რეფორმის გააზრება ფიზიკური პირის, სპიკერისა და აღმასრულებლის პოზიციიდან მოგვიწია. მახსენდება რეფორმის პირველი დღეები ის აჟიოტაჟი, დაბნეულობა, კითხვები, ხალხის, თანამშრომლების აგრესია და საკუთარი, იმ დროისთვის, ჯერ კიდევ უარყოფითი პოზიცია.
შემდგომ მიხეილ ჭელიძის პრეზენტაცია, რომელმაც სრულიად გასცა პასუხი რეფორმის საკანონმდებლო მხარესთან დაკავშირებით, საპენსიო სააგენტოს მიერ გაწეულმა შრომამ, ახალგაზრდების საუბრებმა ერთგვარი პოზიტიური მუხტი შექმნა, თუმც არ გააქარწყლა არსებული სკეპტიკური მოსაზრებები. ახლა როდესაც ტექნიკური საკითხების უმეტესობა დალაგდა, ძალიან სასარგებლო აღმოჩნდა 6 მარტს სასტუმრო "იოტაში "პროფესიული განვითარების კავშირის" მიერ ორგანიზებული შეხვედრა, სადაც ფეისბუქზე არსებული ჯგუფის "ბუღალტერთა კავშირი"-ს წევრებს შეხვდა საპენსიო სააგენტოს დირექტორის მოადგილე ვაჟა ჯაპოშვილი. სწორედ მან შეგვახსენა, რომ უკვე გავიარეთ გზა 8 ლარიანი პენსიიდან 200 ლარიანამდე და მიუხედავად იმისა, რომ გასაკეთებელი ჯერ კიდევ ბევრია, ქვეყანაში არსებობს გამოცდილების ისეთი რესურსი, რომლითაც ამ გამოწვევას გავუმკლავდებით. რაც შეეხება რეფორმის ტექნიკურ მხარეს, ვხედავ როგორ აწყობილად მუშაობს საპენსიო სააგენტოს ყველა თანამშრომელი, როგორ ცდილობენ, რეფორმის შესახებ ინფორმაცია მიიტანონ საბოლოო მომხმარებლამდე, როგორ აუჯობესებენ ტექნიკურ მხარეს. საპენსიო სააგენტოდან ყველა კითხვაზე ამომწურავ პასუხებს ვიღებთ. ძალიან დიდი ყურადღება ექცევა ბუღალტრებს, მათთვის სააგენტო ატარებს ტრენინგებს, მუშაობს ცხელი ხაზი და ფეისბუქ გვერდი, სადაც კითხვის დასმა და პასუხის მიღება შეუძლია ნებისმიერ მსურველს. მომწონს, რომ გვაქვს უკუკავშირი და ყველა ჩვენთაგანს შეუძლია გამოთქვას საკუთარი დადებითი, თუ უარყოფითი მოსაზრება, სამუშაო პროცესის ან მასში შესატანი ცვლილებების შესახებ", განმარტავს ტატა ბერიძე.
