23 მარტიდან თბილისის მერიის მულტიფუნქციური ბიბლიოთეკების გაერთიანება და ნიუტონის თავისუფალი სკოლა ახალ ერთობლივ საგანმანათლებლო პროეტს იწყებენ. „მედიათეკების საშაბათო სკოლა ნიუტონთან ერთად“ 1 ივნისამდე გაგრძელდება და ვაკის, ვარკეთილისა და ნაძალადევის მედიათეკებში განხორციელდება.
პროექტი 8-დან 11 წლამდე ბავშვებისთვისაა განკუთვნილი და მათ თვალსაწიერის გაზრდას, ახალი საგნებით დაინტერესებასა და შესწავლილი მასალის ვიზუალიზაციის უნარის განვითარებას ემსახურება.
გაკვეთილებს ჩაატარებენ ნიუტონის თავისუფალი სკოლის მასწავლებლები: თამარ კიკნაველიძე, ალექს ჩიღვინაძე და ბექა მამუკაშვილი, დამხმარე მასწავლებელი - მხატვარი თამარ მდივანი. პროექტის კოორდინატორია განათლების ფსიქოლოგი ნინუ კიკნაველიძე.
მსოფლიო ხელოვნების გაკვეთილებზე ბავშვებს ელით საინტერესო მოგზაურობა დროში, გაიფართოებენ თვალსაწიერს და სხვადასხვა მასალის გამოყენებით შექმნიან გაცნობილ ხელოვნების ნიმუშებს.
ლიტერატურისა და კომიქსის გაკვეთილები კითხვის უნარის გამომუშავებას, წაკითხულის გააზრებასა და ემპათიის განვითარებას დაეთმობა პერსონაჟების ადგილას თავის წარმოდგენის გზით. ბავშვები განივითარებენ კვლევის, ზეპირი და წერილობითი კომუნიკაციის უნარს, ისწავლიან დისკუსიაში მონაწილეობასა და წაკითხულის ინტერპრეტირებას. ასევე შექმნიან კომიქსს და გაეცნობიან კომიქსის ისტორიას, ისწავლიან პერსონაჟის ჩამოყალიბებას, სიუჟეტის აგებას და ა.შ.
კოსმოსის გაკვეთილზე დედამიწის მიღმა არსებულ სამყაროს გაეცნობიან. ისწავლიან, რეალურად რა მასშტაბზეა ლაპარაკი. ასევე, როგორ მუშაობს მეცნიერება, რატომ მუშაობს, რატომ უნდა ენდოს ან პირიქით - არ ენდო. პროექტის ფარგლებში დედამიწაზე პროექცირებით ისწავლიან, თუ რა სიდიდისაა ჩვენი მზის სისტემა, შემდეგ კი ამ ცოდნას მოარგებენ ჩვენს გალაქტიკას, გალაქტიკათგროვებსა და ბოლოს - სამყაროს.
გაკვეთილები ჩატარდება ეტაპობრივად: სამივე მედიათეკაში თითო საგანში სამ-სამი, ხოლო 1 ივნისს დაგეგმილია შემაჯამებელი შეხვედრა.
სწავლის ერთი თვის გადასახადი 20 ლარია (ათი გაკვეთილი - 40 ლარი). ადგილები შეზღუდულია და თითო ჯგუფში მხოლოდ 15 ბავშვი მიიღება.
იხ. სარეგისტაციო ფორმა: https://goo.gl/GnytAe