10 მარტს, 17-00 საათზე მწერალთა სახლში (მაჩაბლის ქუჩა № 13) ლანა ღოღობერიძის ოთხტომეულის პრეზენტაცია გაიმართება. კრებულში თავმოყრილია ლანა ღოღობერიძის ქარტეხილებით სავსე ცხოვრების მისეული შემოქმედებითი მუხტით დატვირთული და ამაღელვებელი სიმძაფრით დანახული და აღწერილი ეპოქა - „რაც მაგონდება და როგორც მაგონდება“ , „პარიზული ჩანაწერები“, „უოლტ უიტმენი“ ( მონოგრაფია). სტატიები (დაბეჭდილი ქართულ, რუსულ და ფრანგულ ჟურნალ-გაზეთებში (სხვადასხვა დროს), გამოსვლები (ევროსაბჭოში, კულტურის ევროპულ გაერთიანებაში, კინოს პლენუმებზე), ბოლო დროის ჩანაწერები. ერთ ტომში თავმოყრილია სხვადასხვა დროს, სხვადასხვა ენებიდან შესრულებული თარგმანები: ამერიკული, ინდური, ფრანგული, რუსული პოეზია.
ქართველი კინორეჟისორი, დიპლომატი, მხატვარი, მთარგმნელი, პუბლიცისტი, საქართველოს სახალხო არტისტი ლანა ღოღობერიძე დაიბადა 1928 წლის 13 ოქტომბერს. 1950 წელს დაამთავრა თბილისის სახელმწიფო უნივერსისტეტის ფილოლოგიის ფაკულტეტი. არის ფილოლოგიურ მეცნიერებათა კანდიდატი, 1959 წელს დაამთავრა საკავშირო სახელმწიფო კინემატოგრაფიის ინსტიტუტის კინოსარეჟისორო ფაკულტეტი (სერგეი გერასიმოვასა და თამარა მაკაროვას სახელოსნო). 1992 წელს საქართველოს პარლამენტის დეპუტატი გახდა. 1999-2006 წლებში ელჩი ევროკავშირში. 2005-2008 წლებში - საქართველოს მუდმივი წარმომადგენელი იუნესკოში..
ლანა ღოღობერიძის ფილმებმა არაერთი საერთაშორისო ჯილდო დაიმსახურა. არის საბჭოთა კავშირის და საქართველოს სახელმწიფო პრემიის ლაურეატი, ვენეციის, ბერლინის, ტოკიოს, სან-ემოს და სხვა კინოფესტივალების პრემიების ლაურეატი, თბილისის საპატიო მოქალაქე.
ოთხტომეული ეძღვნება ლანა ღოღობერიძის 90 წლისთავს.
ოთხტომეულის გამოცემის მხარდამჭერნი არიან:
- საქართველოს განათლების, მეცნიერების, კულტურისა და სპორტის სამინისტრო;
- ქალაქ თბილისის მუნიციპალიტეტის მერია;
- საქართველოს კულტურის პალატა;
- საქართველოს კინემატოგრაფიის ეროვნული ცენტრი;
- ხელოვან ქალთა საერთაშორისო ასოციაცია.
