27 თებერვალს, სასტუმრო “რუმსში” გაიმართება კვლევის შედეგების პრეზენტაცია და საჯარო დისკუსია თემაზე: „ეკონომიკური დიპლომატია საქართველოში: არსებული პრაქტიკა და სამომავლო პერსპექტივა“
კვლევის მიზანი ეკონომიკური დიპლომატიის მიმართულებით საქართველოს მთავრობის პრიორიტეტების იდენტიფიცირებაა. ის მიმოიხილავს ეკონომიკურ დიპლომატიაზე პასუხისმგებელი სახელმწიფო ინსტიტუტების ძირითად ფუნქციებს. დოკუმენტი ასევე აანალიზებს ევროკავშირის იმ ქვეყნების გამოცდილებას, სადაც ეკონომიკურ დიპლომატიას ეკონომიკური განვითარების მიზნების მისაღწევად სტრატეგიული მნიშვნელობა ენიჭება.
კვლევამ გამოკვეთა, რომ არსებული ინსტიტუციური სტრუქტურის და რესურსების პირობებში საქართველოს შეუძლია გააუმჯობესოს ეკონომიკური დიპლომატიის ინსტიტუტების ფუნქციონირება . პრეზენტაციის ფარგლებში მოხდება ეკონომიკური დიპლომატიის მიმართულებით არსებული კოორდინაციის, თანამშრომლობისა და სტრატეგიული მიდგომების გასაუმჯობესებლად აუცილებელი შემდეგი ძირითადი ფაქტორების წარდგენა:
- საქართველოს ეკონომიკური დიპლომატიის ერთიანი სახელმწიფო ხედვის შემუშავება;
- ეკონომიკური დიპლომატიის საბჭოს შექმნა;
- ეკონომიკური დიპლომატების უნარ-ჩვევებისა და შესაძლებლობების განვითარება;
- ეკონომიკური დიპლომატიის აქტივობების პრიორიტეტიზაცია;
- მეთოდოლოგიის შემუშავება ბაზრების პრიორიტეტიზაციისთვის;
- ინდივიდუალური სტრატეგიების შემუშავება სამიზნე ბაზრებისათვის;
- ეკონომიკური დიპლომატიის წლიური ანგარიშის გამოქვეყნება.
კვლევის პრეზენტაციას გააკეთებს პი ემ სი კვლევითი ცენტრის მკვლევარი მიხეილ სხიერელი , ხოლო პრეზენტაციას მოდერაციას გაუწევს ჰანს გუტბროდი, მეწარმე.
კვლევა ჩატარდა პროექტის „საჯარო პოლიტიკის განხილვისა და დიალოგის პლატფორმის“ ფარგლებში, რომელიც მიზნად ისახავს ეკონომიკურ საკითხებზე დისკუსიის დაწყებას და კოოპერაციას სხვადასხვა მხარეებს შორის. პროექტი ხორციელდება „პი ემ სი კვლევითი ცენტრის“ მიერ საკონსულტაციო კომპანია PMCG-ის მხარდაჭერით.
