"ქართული ოცნება," როგორც ერთიანი მონოლითური ძალა, აუცილებლად წარდგება ჩვენი ამომრჩევლის წინაშე, - ასე ეხმიანება ეკა ბესელიას მიერ ფრაქციის შექმნის დაანონსებას საპარლამენტო უმრავლესობის წევრი დავით მათიკაშვილი.
მათიკაშვილის თქმით, ეკა ბესელიას შეუძლია ისე იმოქმედოს, როგორც საჭიროდ ჩათვლის.
„ქალბატონი ეკა ბესელია და რამდენიმე მისი თანამოაზრე ემიჯნებიან უმრავლესობას და ქმნიან ახალ პოლიტიკურ ძალას. პარტია "ქართულმა ოცნებამ," მისმა პოლიტსაბჭომ დააფიქსირა კონკრეტული პოზიცია საკითხთან მიმართებაში, თუკი არ ხდება ამ პოზიციასთან თანხვედრა გუნდის წევრების, რაღაც გარკვეული ნაბიჯები გადაიდგა და საზოგადოებამ ამის შესახებ იცის. რა იქნება 2020 წელს, ამაზე ნამდვილად ვერ გესაუბრებით. დღეს ჩვენ შეგვიძლია ვისაუბროთ იმაზე, რაც ხდება დღეს. რაც შეეხება 2020 წელს, ერთი რამ შემიძლია გითხრათ, რომ "ქართული ოცნება," როგორც ერთიანი მონოლითური ძალა, აუცილებლად წარდგება ჩვენი ამომრჩევლის წინაშე,“ - განაცხადა დავით მათიკაშვილმა.
ფრაქციის შექმნა ეკა ბესელიამ დღეს დააანონსა. მისი თქმით, ფრაქციის შექმნის მიზნით კონსულტაციებს იწყებს.