7 თებერვალს, 11:00 საათზე, სასტუმრო იოტას წინ, გაიმართება საპროტესტო აქცია საქართველოში დაგეგმილი ჰიდროელექტროსადგურების (ჰესები) პროექტების წინააღმდეგ. აქციას მართავს ზემო და ქვემო სვანეთის, ლეჩხუმის, ონის, აჭარისა და პანკისის წარმომადგენლები.
როგორც ცნობილია დღეს სასტუმრო იოტაში იწყება ევროპის რეკონსტრუქციისა და განვითარების ბანკის (EBRD) გარემოსდაცვითი და სოციალური პოლიტიკის საჯარო განხილვები. აღსანიშნავია, რომ ევროპის რეკონსტრუქციისა და განვითარების ბანკი განიხილავს შესაძლებლობას ნენსკრას, ხელედულას, ნამახვანის, ონის, მაჭახელასა და სხვა ჰესების პროექტების დაფინანსების შესაძლებლობას საქართველოში. შესაბამისად, აქციაზე მონაწილეები მოუწოდებენ ევროპის რეკონსტრუქციისა და განვითარების ბანკს არ დააფინანსოს საქართველოში ზემოაღნიშნული პროექტები და არ შეუწყოს ხელი საქართველოს მთიანეთის დაცლას.
აქციის მონაწილეები ასევე მოუწოდებენ საქართველოს მთავრობას გადახედოს საკუთარ პოლიტიკას ჰესების მშენებლობასთან დაკავშირებით. ადგილობრივი მოსახლეობის წუხილს სრულად იზიარებენ გარემოსდაცვითი და უფლებედამცველი ორგანიზაციები, მათ შორის მწვანე ალტერნატივა, საქართველოს ახალგაზრდა იურისტთა ასოციაცია და ადამიანის უფლებების სწავლებისა და მონიტორინგის ცენტრი (EMC).
