ქვეყანაში ფასების ზრდასთან დაკავშირებით ჯონდი ბაღათურია პარლამენტში სამთავრობო საათის გამართვას და ეკონომიკური გუნდის დაბარებას ითხოვს. ამის შესახებ განცხადება ბაღათურიამ დღეს პარლამენტში საგანგებოდ გამართულ ბრიფინგზე გააკეთა და როგორც მან აღნიშნა, მისი პარტიის ინიციატივით შეიქმნა სამუშაო ჯგუფი, რომელმაც შეისწავლა ფასების ზრდის ტენდენცია და მისი თქმით, "ბაზრის შესწავლის შედეგად აღმოჩნდა, რომ ფქვილისა და პურ პროდუქტების ფასების ზრდასთან ერთად ფასი გაზრდილია პრაქტიკულად ყველა ძირითად საკვებ პროდუქტზე. ფასები გაზრდილია როგორც საბითუმო ასევე საცალო პროდუქტებზე 10, 30 და 50 პროცენტით", _ აცხადებს ბაღათურია.
იგი შეშფოთებას გამოხატავს იმის გამო, რომ სოციალურად დაუცველ მოსახლეობას არ შეუძლია ფასების ზრდით გამოწვეული დანახარჯების დაფარვა.
"შეიძლება ითქვას, რომ მოსახლეობის ეს კატეგორია უკვე შიმშილობს, რაც ზამთარში კიდევ უფრო მწვავე ფორმებს მიიღებს", _ შიშობს ბაღათურია და ითხოვს, რომ "პარლამენტისა და მთავრობის ძალისხმევით სასწრაფოდ განხორციელდეს ქმედითი ღონისძიებები ამ უკიდურესად გაჭირვებული მოსახლეობის გადასარჩენად, წინააღმდეგ შემთხვევაში ამ ადამიანებს უბრალოდ შიმშილთ სიკვდილი ემუქრებათ". სწორედ ამიტომ იგი სამთავრობო საათის გამართვას და პარლამენტში ეკონომიკური გუნდის დაბარებას ითხოვს.
თუმცა როგორც იგი უნდა მოხდეს საარსებო მინიმუმის ახალი ფასების შესაბამისად გადაანგარიშება და მინიმალური პენსიის გაზრდა საარსებო მინიმუმამდე. ასევე სიღარიბის ზღვარს მიღმა პროგრამით გათვალისწინებული შემწეობის გაზრდა და ამ პროგრამაში მოხვედრის გამარტივება.
სოციალურად დაუცველი მოსახლეობის მთლიანად უზრუნველყოფა, უფასო სამედიცინო დაზღვევითა და სამედიცინო პროგრამების დაფინანსება, მედიკამენტების ფასებზე სახელმწიფო რეგულირების დაწესება, სამომხმარებლო ბაზრის გათავისუფლება მონოპოლიისგან, დასაქმების მიზნობრივი პროგრამების დაფინანსება და საგადასახადო ამინისტიის განხორციელება.
