მდგრადი განვითარების მიზნების (SDGs) ეროვნულმა საბჭომ საქართველოში მიღწეული წარმატება და არსებული გამოწვევები განიხილა. SDG საბჭოს მეორე ყოველწლიურ სხდომას, რომელიც 2019 წლის 22 იანვარს საქართველოს მთავრობის ადმინისტრაციისა და გაეროს თავმჯდომარეობით გაიმართა, საქართველოს მთავრობის, გაეროს, სამოქალაქო საზოგადოების, კერძო სექტორის, აკადემიური ინსტიტუტებისა და საერთაშორისო ორგანიზაციების 130-ზე მეტი წარმომადგენელი დაესწრო.
“საქართველო იმ მოწინავე ქვეყნების რიგშია, სადაც მდგრადი განვითარების მიზნების ნაციონალიზაცია და პოლიტიკურ, ეკონომიკურ და სოციალურ განვითარებაში ინტეგრირება ადრეულ ეტაპზე განხორციელდა”, - განაცხადა საქართველოს მთავრობის ადმინისტრაციის ხელმძღვანელმა, კახა კახიშვილმა. “მდგრადი განვითარების დღის წესრიგი უნიკალური შესაძლებლობაა ისეთიგამოწვევების დასაძლევად, როგორებიცაა ეკონომიკური და სოციალური უთანასწორობა და კლიმატის ცვლილება”.
გაეროს ხელმძღვანელმა საქართველოში, ლუიზა ვინტონმა, აღნიშნა, რომ 2015 წელს მდგრადი განვითარების დეკლარაციის ხელმოწერით საქართველომ კიდევ ერთი ნაბიჯი გადადგა თანასწორობისა და ჩართულობის პრინციპებზე დაფუძნებული მშვიდობიანი და სამართლიანი საზოგადოების ასაშენებლად.
“წელს საქართველო საერთაშორისო მისიასუმასპინძლებს, რომელიც მდგრადი განვითარების მიზნების მიღწევას და ამ პროცესის დაჩქარებას დაეხმარება. მისიის შედეგებზე დაყრდნობით საქართველო შეძლებს მდგრადი განვითარების მიზნების გათვალისწინებას ყველა სექტორში და იმ შესაძლო რისკების უკეთ მართვას, რომლებიც პოლიტიკურ, ეკონომიკურ და გარემოსდაცვით საფრთხეებს უკავშირდება“, - თქვა გაეროს ხელმძღვანელმა.
SDG საბჭომ განსაკუთრებული ყურადღება საქართველოს იმ ეროვნულ მიზნებს დაუთმო, რომლებიც ეკონომიკურ განვითარებას, კლიმატის ცვლილების დაძლევას, გარემოს დაცვასა და განათლების გაუმჯობესებას ითვალისწინებს. შესაბამისი სამინისტროების წარმომადგენლებმა ამ საკითხებში ქვეყნის ამჟამინდელ მდგომარეობასადა სამომავლო პერსპექტივებზე ისაუბრეს. მსჯელობა შეეხო ისეთ საკითხებს, როგორებიცაა მდგრადი ტურიზმი, ბიზნესის განვითარება, ინდუსტრიალიზაცია, ინკლუზიური განათლება, ტყეებისა და ბიომრავალფეროვნების დაცვა და მდგრადი ურბანული განვითარება.
საქართველოს მთავრობის ადმინისტრაციამ წარადგინა ახალი ელექტრონული სისტემა, SDG Tracker, რომელიც 2019 წელს ამოქმედდება და რომლის მეშვეობითაც შესაძლებელი გახდებამდგრადი განვითარების მიზნების შესრულების ორასზე მეტი ინდიკატორის მონიტორინგი.
SDG საბჭო მდგრადი განვითარების მიზნების შესრულების მონიტორინგსა და კოორდინირებას ემსახურება და ამ საკითხებში საქართველოს მთავარ ორგანოს წარმოადგენს. საბჭო მოქმედებს ოთხი სამუშაო ჯგუფის მეშვეობით, რომელთა ძირითადი მიმართულებებია სოციალური ჩართულობა, ეკონომიკური განვითარება, დემოკრატიული მმართველობა და მდგრადი ენერგეტიკა და გარემოს დაცვა. საბჭოს მუშაობაში ჩართულია 165 საჯარო უწყება და სამოქალაქო საზოგადოების, კერძო სექტორისა და აკადემიურიინსტიტუტების წარმომადგენლები. SDG საბჭო შეიქმნა 2017 წელს საქართველოს მთავრობის ადმინისტრაციის ინიციატივითა და გაეროსა და შვედეთის მთავრობის ხელშეწყობით.
