მცხეთა–სტეფანწმინდა–ლარსის საავტომობილო გზაზე საცობია. საავტომობილო მაგისტრალზე გადაადგილება ფაქტობრივად პარალიზებულია. ადამიანები, რომლებიც საცობში არიან მოყოლილები ამბობენ, რომ მათი ავტომობილი ერთ ადგილზე დგას და გადაადგილება ვერ ახერხებენ.
მგზავრების ნაწილი, რომელთაც საცობს თავი დააღწიეს განმარტავენ, რომ საცობში რამდენიმე საათი გაატარეს, რისი მიზეზიც გზის გადატვირთულობა იყო. ორმხრივ ტრასაზე გადაადგილება ნაწილ-ნაწილს ხდებოდა.
მგზავრები ამბობენ, რომ მოძრაობა გზებზე გაჩერებული ტრალერების გამო ფერხდება, რომლებიც თავის მხრივ კობი-გუდაურის გზის გახსნას რამდენიმე დღეა ელოდნენ და გახსნის შემდეგაც კი მათი გადაადგილება შეზღუდვით ხორციელდება.
როგორც ცნობილია, გუდაური-კობის მონაკვეთზე მსუბუქი ავტოტრანსპორტის მოძრაობა დღეს შუადღით აღდგა.
თოვლის და ლიპყინულის გამო, საერთაშორისო მნიშვნელობის მცხეთა–სტეფანწმინდა–ლარსის (რუსეთის ფედერაციის საზღვარი) საავტომობილო გზის გუდაური(ფოსტა)-კობის მონაკვეთზე აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა თავისუფალია.
გარემოს ეროვნული სააგენტოს ცნობით, გუდაური(ფოსტა)–კობის მონაკვეთზე ავტოტრანსპორტის მოძრაობა განხორციელდება გაუჩერებლად გავლის რეჟიმში, მხოლოდ ზვავდამცავი გვირაბების გავლით.
გარემოს ეროვნული სააგენტოს ცნობით, მლეთა-გუდაურის (სოფ. ქვემო მლეთადან ს/გზის კმ85 მონაკვეთამდე) მონაკვეთზე ავტოტრანსპორტის მოძრაობა განხორციელდება გუჩერებლად გავლის რეჟიმში.
აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით.
