თუ ეს სია დამტკიცდება, მე ძალიან გავბრაზდები, წამოსვლა ამ შემთხვევაში შეიძლება ვერც მოვახერხო, ტერორიზმშიც შეიძლება გამოიხატოს, ავიფეთქო თავი, პარლამენტში ტროტილით მივიდე, - ამის შესახებ უმრავლესობის დეპუტატმა გედევან ფოფხაძემ უზენაესი სასამართლოს მოსამართლეობის კანდიდატთა სიასთან დაკავშირებით, ტელეკომპანია "კავკასიის" ეთერში განაცხადა.
მისი თქმით, ეს მისი პრინციპებისა და ღირებულებებისთვის ძალიან მნიშვნელოვანი გამოცდაა, ამიტომ უკან ვერ დაიხევს.
"თუ ეს სია დამტკიცდება, მე ძალიან გავბრაზდები. წამოსვლა ამ შემთხვევაში შეიძლება ვერც მოვახერხო, რა. ძალიან გავბრაზდები, აი, ჭკუიდან გადავალ, აბსოლუტურად არაადეკვატური გავხდები. რაში გამოიხატება მაგი მერე ვნახოთ. ტერორიზმშიც შეიძლება გამოიხატოს, ავიფეთქო თავი, პარლამენტში ტროტილით მივიდე. იცი რა, მე მგონია, რომ ეს არის ჩემი პრინციპებისა და ღირებულებებისთვის ძალიან მნიშვნელოვანი გამოცდა, ამიტომ მე ამაზე უკან ვერ დავიხევ. შეიძლება საერთოდ არაადეკვატური გავხდე და რაიმე ისეთი რამე გავაკეთო, რაც სისხლის სამართლის კოდექსსაც ეწინააღმდეგება", - განაცხადა ფოფხაძემ.
ცნობისთვის, იუსტიციის უმაღლესმა საბჭომ უზენაეს სასამართლოში წარსადგენი მოსამართლეთა 10 კანდიდატურა დაასახელა: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე. 10-კაციანი სია იუსტიციის საბჭომ დასამტკიცებლად პარლამენტს გადაუგზავნა.
